२०८ अशोक वृक्षांच्या संगोपनाची दखल; इंडिया बुक ऑफ रेकॉर्ड आणि एशिया बुक ऑफ रेकॉर्डचे प्रमाणपत्र प्रदान
पुरंदर (प्रतिनिधी) : पर्यावरण संवर्धन आणि सामाजिक उत्तरदायित्वाच्या क्षेत्रात उल्लेखनीय योगदान देणाऱ्या सासवड इंडस्ट्रियल इस्टेट येथील किर्लोस्कर न्यूमॅटिक कंपनी लिमिटेडचा जागतिक स्तरावर सन्मान करण्यात आला आहे. कंपनीने औद्योगिक परिसरात केलेल्या २०८ अशोक वृक्षांच्या लागवड व संगोपनाच्या उपक्रमाची दखल घेत इंडिया बुक ऑफ रेकॉर्ड आणि एशिया बुक ऑफ रेकॉर्ड यांच्याकडून प्रमाणपत्रे प्रदान करण्यात आली आहेत.
कंपनीच्या पर्यावरणपूरक उपक्रमाची माहिती देताना मानव संसाधन विभागाचे प्रमुख गणेश चौधरी यांनी सांगितले की, शाश्वत आणि पर्यावरणपूरक औद्योगिक परिसर निर्माण करण्याच्या उद्देशाने १९८५ मध्ये कंपनी परिसरात अशोक वृक्षांची लागवड सुरू करण्यात आली. दोन ते तीन वर्षांच्या कालावधीत ही लागवड पूर्ण करण्यात आली. त्यानंतर गेल्या चार दशकांपासून या वृक्षांची सातत्याने निगा राखण्यात आली. आज या रोपांचे मोठ्या वृक्षांमध्ये रूपांतर झाले असून, कंपनी परिसरात २०८ अशोक वृक्ष उभे आहेत.
हे वृक्ष कंपनीच्या परिसराचा अविभाज्य भाग बनले असून, परिसराच्या सौंदर्यात भर घालण्यासोबतच स्थानिक जैवविविधतेच्या संवर्धनासाठीही योगदान देत आहेत. औद्योगिक विकासाबरोबरच पर्यावरणाचे रक्षण, हरितक्षेत्राची वाढ आणि जैवविविधतेचे जतन हा या उपक्रमामागील मुख्य उद्देश असल्याचे चौधरी यांनी स्पष्ट केले.
या विक्रमाची नोंद करण्यासाठी वृक्षांची संख्या, लागवडीचे क्षेत्र, वृक्षांची ओळख, छायाचित्रे तसेच आवश्यक कागदपत्रे आणि पुरावे यांचे शास्त्रोक्त पद्धतीने दस्तऐवजीकरण करण्यात आले. या प्रक्रियेत पुण्यातील युनिक लॅबने पर्यावरणीय सल्लागार म्हणून महत्त्वाची भूमिका बजावली.
२०८ अशोक वृक्षांचे संगोपन हा केवळ विक्रम प्रस्थापित करण्याचा प्रयत्न नसून उद्योग आणि पर्यावरण यांच्यात समतोल साधण्याच्या दिशेने उचललेले प्रेरणादायी पाऊल आहे. अशोक वृक्षांचे पर्यावरणीय, सांस्कृतिक आणि सौंदर्यात्मक महत्त्व लक्षात घेऊन या उपक्रमातून पर्यावरण संवर्धनाचा संदेश देण्याचा प्रयत्न करण्यात आल्याचेही गणेश चौधरी यांनी सांगितले.
औद्योगिक क्षेत्रात पर्यावरणपूरक उपक्रम राबवून त्यांचे दीर्घकाळ संगोपन कसे करता येते, याचे उदाहरण किर्लोस्कर न्यूमॅटिक कंपनीने निर्माण केले आहे. या जागतिक स्तरावरील सन्मानामुळे कंपनीच्या पर्यावरण संवर्धनाच्या प्रयत्नांना विशेष ओळख मिळाली आहे.
