दीर्घकाळ प्रामाणिकपणे सेवा बजावणाऱ्या कर्मचाऱ्यांचा मान्यवरांच्या हस्ते सत्कार; पुढील आयुष्यासाठी शुभेच्छांचा वर्षाव
अंबरनाथ, प्रतिनिधी, दि. ३० ऑक्टोबर २०२६ : अंबरनाथ नगरपालिकेत दीर्घकाळ निष्ठेने आणि प्रामाणिकपणे सेवा बजावणारे श्री. पांडुरंग कचरू जाधव हे आज, ३० ऑक्टोबर २०२६ रोजी शासकीय सेवेतून सेवानिवृत्त झाले. त्यांच्यासह एकूण १२ कर्मचारी सेवेतून निवृत्त झाले. या सर्व कर्मचाऱ्यांच्या उल्लेखनीय सेवाकार्याचा गौरव करण्यासाठी अंबरनाथ नगरपालिका कार्यालयात विशेष सत्कार सोहळ्याचे आयोजन करण्यात आले होते.
श्री. पांडुरंग जाधव यांनी आपल्या सेवाकाळात सफाई विभागासह अन्य विभागांमध्येही मनापासून, निष्ठेने आणि प्रामाणिकपणे काम केले. त्यांच्या कष्टाळू व उल्लेखनीय सेवाकार्याची दखल घेत नगरपालिकेच्या वतीने त्यांचा सन्मान करण्यात आला.
या गौरव सोहळ्यास अंबरनाथ नगरपालिकेच्या नगराध्यक्ष सौ. तेजश्री विश्वजीत करंजुले-पाटील, मुख्याधिकारी श्री. उमाकांत गायकवाड, अतिरिक्त मुख्याधिकारी श्री. मयुरेश भुजबळ, नगरसेवक श्री. सचिन सदाशिव पाटील आणि उपमुख्याधिकारी श्री. उमेश राऊत यांच्यासह नगरपालिकेचे अधिकारी, कर्मचारी, सहकारी आणि मित्रपरिवार मोठ्या संख्येने उपस्थित होते.
यावेळी मान्यवरांच्या हस्ते श्री. पांडुरंग जाधव यांच्यासह सर्व सेवानिवृत्त कर्मचाऱ्यांचा सत्कार करण्यात आला. त्यांच्या दीर्घ सेवाकाळातील योगदानाचे कौतुक करून उपस्थितांनी पुढील आयुष्यासाठी उत्तम आरोग्य, दीर्घायुष्य आणि सुख-समृद्धीच्या मनःपूर्वक शुभेच्छा दिल्या.
