ओबीसी संघटनेचा मोर्चा आणि दिवाळी सणाच्या पार्श्वभूमीवर कायदा व सुव्यवस्था राखण्यासाठी प्रशासनाचा निर्णय
गोंदिया, दि. ३० ऑक्टोबर २०२६ : जिल्ह्यात विविध राजकीय पक्ष व संघटनांकडून प्रलंबित मागण्यांसाठी उपोषण, धरणे, मोर्चे, रास्ता रोको, जेल भरो आणि संप यांसारखी आंदोलने आयोजित केली जात आहेत. तसेच १ नोव्हेंबर रोजी ओबीसी संघटनेच्या वतीने मोर्चाचे आयोजन करण्यात येणार असून, ६ ते ११ नोव्हेंबर २०२६ या कालावधीत दिवाळी सण साजरा करण्यात येणार आहे.
या पार्श्वभूमीवर जिल्ह्यात कायदा व सुव्यवस्था अबाधित राखण्यासाठी तसेच कोणतीही अनुचित घटना घडू नये, यासाठी अतिरिक्त जिल्हादंडाधिकारी भैय्यासाहेब बेहेरे यांनी मनाई आदेश लागू केले आहेत.
मुंबई पोलीस अधिनियम, १९५१ मधील कलम ३७ (१) व (३) अन्वये प्राप्त अधिकारांचा वापर करून ३० ऑक्टोबर २०२६ पासून १३ नोव्हेंबर २०२६ पर्यंत संपूर्ण गोंदिया जिल्ह्यात हे आदेश लागू राहणार आहेत.
सदर अधिसूचनेतील कोणत्याही अटी व शर्तींचे उल्लंघन केल्यास संबंधितांविरुद्ध फौजदारी कायद्यानुसार योग्य ती कारवाई करण्यात येईल, असे प्रशासनाच्या वतीने स्पष्ट करण्यात आले आहे.
