सोनखेड साठवण तलावातून दररोज दोन तास पाणी सोडण्याची मागणी; शेकडो शेतकऱ्यांसह तहसीलदारांना निवेदन
प्रतिनिधी : जाफराबाद : जाफराबाद तालुक्यातील वरूड, सोनखेडसह परिसरातील गावांमध्ये शेतकरी, पशुधन आणि जनावरांच्या चाऱ्याचा पाण्याचा प्रश्न गंभीर बनला असल्याचा मुद्दा उपस्थित करत सोनखेड साठवण तलावातून दररोज दोन तास पाणी उपलब्ध करून देण्याची मागणी स्वाभिमानी शेतकरी संघटनेचे युवक प्रदेशाध्यक्ष मयूर बोरडे यांनी केली आहे.
या मागणीसाठी शेकडो शेतकऱ्यांसह जाफराबाद तहसील कार्यालयात जाऊन तहसीलदार मंगेश साबळे यांना निवेदन देण्यात आले. सोनखेड साठवण तलावातून शेतकऱ्यांना, जनावरांना तसेच जनावरांच्या चाऱ्यासाठी पाणी उपलब्ध करून द्यावे, अशी मागणी निवेदनाद्वारे करण्यात आली.
वरूड, सोनखेड, भराडखेड, सावर्डखेड, गोंधनखेड, सोनगिरी, गोपी, खापरखेड आणि खासगाव आदी गावांतील शेतकऱ्यांना पाणीटंचाईचा सामना करावा लागत असल्याचे निवेदनात नमूद करण्यात आले आहे. पाण्याअभावी शेती, पशुधन आणि जनावरांच्या चाऱ्याचा प्रश्न निर्माण होत असल्याने प्रशासनाने तातडीने हस्तक्षेप करावा, अशी मागणी शेतकऱ्यांनी केली.
तहसीलदारांनी पाच दिवसांच्या आत या प्रश्नावर निर्णय घेऊन पाणी उपलब्धतेचा प्रश्न मार्गी लावावा, अशी मागणी मयूर बोरडे यांनी केली. येत्या ५ नोव्हेंबरपर्यंत मागणी मान्य न झाल्यास शेकडो शेतकऱ्यांसह सोनखेड साठवण तलावात जलसमाधी आंदोलन करण्यात येईल, असा इशाराही त्यांनी दिला.
दरम्यान, परिसरातील शेतकरी आणि पशुधनासाठी पाणी उपलब्ध करून देण्याबाबत प्रशासन काय निर्णय घेते, याकडे संबंधित गावांतील नागरिकांचे लक्ष लागले आहे.
