रंगीबेरंगी विद्युत रोषणाई, आकर्षक कारंजे आणि देखणी वास्तुरचना; रात्रीच्या प्रकाशझोतात परिसर उजळला
हिंगणघाट | शहर प्रतिनिधी :
हिंगणघाट शहरातील डॉ. बाबासाहेब आंबेडकर चौकातील पुतळा परिसराचे आकर्षक सौंदर्यीकरण सध्या नागरिकांचे लक्ष वेधून घेत आहे. विशेषतः रात्रीच्या वेळी रंगीबेरंगी विद्युत रोषणाई, कारंज्यांमधून उडणारे रंगीत पाण्याचे तुषार आणि देखणी वास्तुरचना यामुळे संपूर्ण परिसराचे सौंदर्य अधिकच खुलून दिसत आहे.
चौकातील सौंदर्यीकरणाला आकर्षक स्वरूप देण्यात आले असून, संसद भवनाच्या धर्तीवरील वास्तुरचनेत महामानव डॉ. बाबासाहेब आंबेडकर यांचा पुतळा उभारण्यात आला आहे. रात्रीच्या वेळी विद्युत रोषणाईमुळे हा परिसर विशेष आकर्षक दिसत असून, नागरिक येथे भेट देत आहेत.
या सौंदर्यीकरणाचे काम हिंगणघाट विधानसभा मतदारसंघाचे आमदार समीरभाऊ कुणावार यांच्या आमदार निधीतून पूर्ण करण्यात आले आहे. या विकासकामामुळे चौकाच्या सौंदर्यात भर पडल्याने नागरिकांकडून समाधान व्यक्त केले जात असून, आमदार समीरभाऊ कुणावार यांचे कौतुक करण्यात येत आहे.
या परिसरात भेट देणाऱ्या काही नागरिकांशी संवाद साधला असता त्यांनी आपल्या भावना व्यक्त केल्या. रात्रीच्या वेळी येथे येऊन महामानव डॉ. बाबासाहेब आंबेडकर यांच्या पुतळ्याला अभिवादन करताना मनाला वेगळीच शांतता मिळते, असे नागरिकांनी सांगितले. बाबासाहेबांनी आयुष्यभर संघर्ष करून समाजाला समता, स्वातंत्र्य, बंधुता आणि न्यायाचा मार्ग दाखवला. त्यांच्या महान कार्याचे स्मरण करण्यासाठी या ठिकाणी येत असल्याचेही त्यांनी नमूद केले.
चौकातील आकर्षक रोषणाई आणि कारंजे हे केवळ सौंदर्याचे प्रतीक नसून, महामानवाच्या विचारांचे स्मरण करून देणारे ठिकाण म्हणूनही या परिसराकडे पाहिले जात आहे. बाबासाहेबांचा प्रकाशझोतात उजळलेला पुतळा आणि परिसराची देखणी रचना नागरिकांसाठी आकर्षणाचे केंद्र ठरत आहे.
एकंदरीत, हिंगणघाटमधील डॉ. बाबासाहेब आंबेडकर चौकाचे सौंदर्यीकरण शहराच्या सौंदर्यात भर घालणारे ठरत असून, नागरिकांसाठी हे ठिकाण आकर्षणासोबतच महामानवाला अभिवादन करण्याचे प्रेरणादायी केंद्र बनले आहे.
