शिवसेनेच्या माध्यमातून दिव्यांग, वयोवृद्ध व निराधारांच्या घरी दिवाळीचा शिधा; युवकांनी घरोघरी जाऊन केले किराणा किटचे वाटप
नांदूर घाट, ता. केज, जि. बीड | प्रतिनिधी
दिवाळीच्या झगमगाटात समाजातील शेवटच्या घटकाच्याही घरात आनंदाचा दिवा पेटावा, या सामाजिक भावनेतून नांदूर घाट येथे शिवसेनेच्या वतीने स्तुत्य उपक्रम राबविण्यात आला. शिवसेना केज तालुका सोशल मीडिया प्रमुख कृष्णा परबळे, शिवसेना बीड जिल्हा सोशल मीडिया प्रमुख आदित्य ठोके आणि प्रथमेश खोमणे यांच्या पुढाकारातून गावातील दिव्यांग, वयोवृद्ध आणि आर्थिकदृष्ट्या गरजू कुटुंबांना घरोघरी जाऊन दिवाळीच्या किराणा साहित्याच्या किटचे वाटप करण्यात आले. या उपक्रमामुळे अनेक गरजू कुटुंबांच्या दिवाळीत आनंदाची भर पडली.
महाराष्ट्र राज्याचे उपमुख्यमंत्री एकनाथ शिंदे आणि खासदार डॉ. श्रीकांत शिंदे यांच्या माध्यमातून, बीड जिल्हाप्रमुख सचिन मुळूक तसेच केज तालुकाप्रमुख अण्णासाहेब पाटील यांच्या मार्गदर्शनाखाली हा उपक्रम राबविण्यात आला.
विशेष म्हणजे, केवळ औपचारिक कार्यक्रम न घेता कृष्णा परबळे, आदित्य ठोके, प्रथमेश खोमणे आणि त्यांच्या सहकाऱ्यांनी थेट गरजूंच्या दारापर्यंत पोहोचण्याचा निर्णय घेतला. गावातील दिव्यांग, वयोवृद्ध आणि निराधार नागरिकांची भेट घेऊन त्यांना किराणा साहित्याच्या किट देण्यात आल्या. सणासुदीच्या काळात मिळालेल्या या मदतीमुळे लाभार्थ्यांच्या चेहऱ्यावर समाधान आणि आनंद दिसून आला.
या उपक्रमाला मंगेश चिवटे यांचे निकटवर्तीय शिवराज आंधळकर सर तसेच अपंग संघटनेचे अध्यक्ष विशाल नाळपे यांची उपस्थिती होती.
पदापेक्षा माणुसकीला प्राधान्य; युवकांच्या पुढाकाराचे कौतुक
सामाजिक कार्य करताना प्रसिद्धीपेक्षा गरजूंच्या चेहऱ्यावरील समाधान अधिक महत्त्वाचे असते, याचा प्रत्यय या उपक्रमातून आला. गावातील गरजू नागरिकांपर्यंत प्रत्यक्ष पोहोचून त्यांची दिवाळी आनंदाची करण्यासाठी पुढाकार घेतल्याबद्दल कृष्णा परबळे, आदित्य ठोके आणि प्रथमेश खोमणे यांचे नांदूर घाटसह परिसरातील नागरिकांकडून कौतुक होत आहे.
राजकारणासोबतच सामाजिक बांधिलकी जपणारे स्थानिक युवक समाजाच्या सुख-दुःखात सहभागी होत असल्याचे या उपक्रमातून दिसून आले. विशेषतः दिव्यांग आणि वयोवृद्ध नागरिकांना सणासुदीच्या काळात दिलेला मदतीचा हात समाजासाठी सकारात्मक संदेश देणारा ठरला.
गरजूंच्या घरापर्यंत पोहोचलेला मदतीचा हात, हाच खऱ्या अर्थाने दिवाळीचा प्रकाश!
