देवीभोयरे आणि नरसाळवाडी येथे पोलिसांची कारवाई; ७ हजार ८४५ रुपयांचा गुटखा व मुद्देमाल जप्त, दोघे ताब्यात तर दोघे फरार
अहिल्यानगर | प्रतिनिधी
पारनेर तालुक्यात अवैध गुटखा विक्री करणाऱ्यांविरोधात अहिल्यानगर स्थानिक गुन्हे शाखेच्या पथकाने दोन ठिकाणी छापे टाकून कारवाई केली. १२ नोव्हेंबर रोजी पारनेर पोलीस ठाण्याच्या हद्दीत देवीभोयरे आणि नरसाळवाडी (शिरापूर) येथे करण्यात आलेल्या या कारवाईत एकूण ७ हजार ८४५ रुपये किमतीचा गुटखा व मुद्देमाल जप्त करण्यात आला. या प्रकरणात दोघांना ताब्यात घेण्यात आले असून, अन्य दोघे फरार झाले आहेत.
जिल्हा पोलीस अधीक्षकांच्या मार्गदर्शनाखाली स्थानिक गुन्हे शाखेच्या पथकाने ही कारवाई केली. जिल्ह्यात अवैध गुटखा विक्रीविरोधात पोलिसांनी कारवाईचा धडाका सुरू ठेवला आहे.
देवीभोयरे येथे एकाला ताब्यात
पहिली कारवाई देवीभोयरे येथे करण्यात आली. यावेळी शंकर देविदास सरडे (वय ३८, रा. देवीभोयरे, ता. पारनेर) याला पोलिसांनी ताब्यात घेतले. तर या प्रकरणातील राजू मणियार (रा. वडझिरे, ता. पारनेर) हा फरार झाला आहे.
नरसाळवाडी येथेही कारवाई
दुसरी कारवाई नरसाळवाडी (शिरापूर) येथे करण्यात आली. या कारवाईत प्रताप माणिकचंद गुगळे (वय ५६, रा. नरसाळवाडी, शिरापूर, ता. पारनेर) याला ताब्यात घेण्यात आले. तर आकाश पिंगट (पूर्ण नाव माहीत नाही, रा. चासकरवाडी, ता. पारनेर) हा फरार झाला आहे.
या दोन्ही कारवायांमध्ये एकूण ७ हजार ८४५ रुपयांचा गुटखा व मुद्देमाल जप्त करण्यात आला असून, फरार आरोपींचा शोध सुरू आहे.
