ग्रामीण भागातील विद्यार्थ्यांना स्पर्धा परीक्षांसाठी मार्गदर्शन; युवक-युवतींच्या शासकीय नोकरीच्या स्वप्नांना मिळणार नवी दिशा
मेहकर | प्रतिनिधी
मेहकर शहरातील ‘शंकरा स्पर्धा परीक्षा मार्गदर्शन केंद्रा’चा शुभारंभ माजी आमदार डॉ. संजय रायमुलकर यांच्या हस्ते उत्साहात पार पडला. ग्रामीण भागातील होतकरू आणि गुणवंत विद्यार्थ्यांना स्पर्धा परीक्षांच्या माध्यमातून यशाची दिशा मिळावी, तसेच शासकीय नोकरीचे स्वप्न पाहणाऱ्या युवक-युवतींना योग्य मार्गदर्शन उपलब्ध व्हावे, या उद्देशाने हा उपक्रम सुरू करण्यात आला आहे.
शिक्षणाच्या माध्यमातून ग्रामीण भागातील युवक-युवतींना सक्षम करण्यासाठी सुरू केलेला हा उपक्रम कौतुकास्पद असल्याचे डॉ. संजय रायमुलकर यांनी यावेळी सांगितले. या केंद्राच्या माध्यमातून अनेक विद्यार्थ्यांची स्वप्ने साकार होवोत आणि मेहकरच्या शिरपेचात यशाचा नवा मानाचा तुरा रोवला जावो, अशा शुभेच्छाही त्यांनी दिल्या.
या नव्या उपक्रमाच्या यशस्वी वाटचालीसाठी रुपेश दिलीपराव पागोरे आणि त्यांच्या संपूर्ण टीमचे त्यांनी अभिनंदन करून पुढील कार्यासाठी शुभेच्छा व्यक्त केल्या.
यावेळी शिवसेनेचे तालुकाप्रमुख भगवान पाटील सुलताने, राजेश काटे आदी मान्यवर उपस्थित होते.
