शेतकऱ्यांच्या प्रलंबित रस्त्यांच्या प्रश्नांवर चर्चा; तहसीलदार आकाश दहाडदे यांची सकारात्मक भूमिका
शेवगाव | प्रतिनिधी
शेतरस्ता पीडित शेतकऱ्यांच्या प्रलंबित प्रश्नांना न्याय मिळवून देण्यासाठी शुक्रवार, दि. १३ नोव्हेंबर रोजी सकाळी ११ वाजता शेवगाव तहसील कार्यालयात ‘जन न्याय दिन’ आयोजित करण्यात आला होता. महाराष्ट्र राज्य शेत व शिव पाणंद रस्ता चळवळीचे प्रणेते शरदभाऊ पवळे यांच्या मार्गदर्शनाखाली आणि चळवळीचे राज्य उपाध्यक्ष नाथाभाऊ शिंदे पाटील यांच्या प्रमुख उपस्थितीत हा उपक्रम पार पडला.
यावेळी तहसीलदार आकाश दहाडदे यांनी चळवळीतील शेतकऱ्यांच्या विविध समस्या आणि शेतरस्त्यांबाबतच्या अडचणींची संवेदनशीलतेने दखल घेतली. शेतकऱ्यांचे रस्त्यांचे प्रश्न तातडीने मार्गी लागावेत, यासाठी दर महिन्याला नियमितपणे एक दिवस ‘जन न्याय दिन’ आयोजित करावा, अशी आग्रही मागणी राज्य उपाध्यक्ष नाथाभाऊ शिंदे पाटील यांनी केली.
या मागणीला सकारात्मक प्रतिसाद देत तहसीलदार आकाश दहाडदे यांनी यापुढे दर महिन्याला निश्चितपणे ‘जन न्याय दिन’ आयोजित करण्यात येईल, असे आश्वासन उपस्थित शेतकऱ्यांना दिले. त्यामुळे शेतरस्ता पीडित शेतकऱ्यांना आपल्या समस्या मांडण्यासाठी नियमित व्यासपीठ उपलब्ध होण्याची अपेक्षा व्यक्त करण्यात आली.
या बैठकीत पोपट हरदास, कल्याण जगदाळे सर, आबासाहेब जायगुडे, सुभाष आव्हाड यांच्यासह इतर शेतकऱ्यांच्या शेतरस्त्यांशी संबंधित प्रश्नांवर सविस्तर चर्चा करण्यात आली. संबंधित अडचणी, प्रलंबित प्रश्न आणि त्यावरील संभाव्य उपाययोजनांबाबत विचारविनिमय करण्यात आला.
या प्रसंगी चळवळीचे नेवासा येथील पदाधिकारी रमेश भक्त, सुभाष आव्हाड, राज्य समन्वयक बाळासाहेब थोरात, विठ्ठल निर्मळ, आशाताई वाघ, सोमनाथ तोडमल, अ‍ॅड. बुधवंत, सदाशिव नवघरे सर आणि राज्य उपाध्यक्ष नाथाभाऊ शिंदे पाटील यांच्यासह मान्यवर व शेतकरी मोठ्या संख्येने उपस्थित होते.
कार्यक्रमाच्या शेवटी कल्याण जगदाळे सर यांनी उपस्थित शेतकरी, मान्यवर आणि प्रशासनाचे आभार मानले.
