लेंडेझरी जंगलात तीन महिन्याच्या वाघाच्या शावकाचा मृत्यू; वनविभागाची तत्काळ कारवाई

तुमसर (भंडारा) – भंडारा जिल्ह्यातील लेंडेझरी वनपरिक्षेत्रात एक दुर्दैवी घटना घडली आहे. आलेसुर-खापा-मांडवी बिट जंगलात तीन महिन्यांच्या पट्टेदार वाघाच्या एका शावकाचा मृत्यू झाला, तर दुसरा शावक गंभीर अवस्थेत आढळून आला. 11 फेब्रुवारी रोजी सायंकाळी ही घटना उघडकीस आली.

वनविभागाची तत्काळ कारवाई

घटनेची माहिती मिळताच लेंडेझरी वनपरिक्षेत्र अधिकारी निरंजन वैद्य व वनविभागाच्या कर्मचाऱ्यांनी घटनास्थळी धाव घेतली. मृत शावक ताब्यात घेण्यात आला, तर अतिशय गंभीर अवस्थेत असलेल्या शावकाला त्वरित नागपूर येथील गोरेवाडा प्राणीसंग्रहालयात उपचारासाठी हलविण्यात आले.

शवविच्छेदन आणि अंत्यसंस्कार

12 फेब्रुवारी रोजी मृत शावकाचे शवविच्छेदन करण्यात आले असून, त्यानंतर चिचोली वन आगारात अंत्यसंस्कार करण्यात आले. शरीरावरील नखे, दात, मिशा आणि अवयव सुरक्षित आढळले, अशी माहिती वनविभागाने दिली आहे.

प्राथमिक अंदाज: अन्न-पाण्याविना मृत्यू?

वनविभागाच्या प्राथमिक तपासानुसार, शावकांचा मृत्यू अन्न-पाण्याच्या अभावामुळे झाला असावा. मात्र, शवविच्छेदन अहवालानंतरच याबाबत अधिकृत माहिती स्पष्ट होईल.

मादी वाघीण बेपत्ता?

घटनास्थळी मादी वाघीणीच्या हालचालींचे संकेत मिळाले असले तरी ती प्रत्यक्ष दिसून आलेली नाही. त्यामुळे शावक आईपासून का वेगळे पडले? याचा शोध घेण्याचे प्रयत्न सुरू आहेत.

दीड महिन्यातील दुसरी घटना

30 डिसेंबर 2024 रोजी देवनारा-कुरमुडा जंगलात एका वाघाचा वाहनाच्या धडकेत मृत्यू झाला होता. त्यानंतर अवघ्या दीड महिन्यातच आणखी एका शावकाचा मृत्यू झाल्याने वन्यजीव संवर्धनावर प्रश्नचिन्ह निर्माण झाले आहे.

NTCA मानकांनुसार तपास सुरू

राष्ट्रीय व्याघ्र संवर्धन प्राधिकरणाच्या (NTCA) मानक कार्यपद्धतीनुसार (SOP) तपास सुरू करण्यात आला आहे. घटनास्थळी NTCA चे प्रतिनिधी शाहिद खान, महाराष्ट्र राज्याचे प्रधान मुख्य वनसंरक्षक (वन्यजीव) यांचे प्रतिनिधी आणि भंडारा जिल्ह्याचे मानद वन्यजीव रक्षक पंकज देशमुख उपस्थित होते.

वन्यजीव संरक्षण अधिनियमांतर्गत गुन्हा दाखल

सदर घटनेप्रकरणी वन्यजीव संरक्षण अधिनियमांतर्गत गुन्हा नोंदवण्यात आला आहे. पुढील तपास उपवनसंरक्षक राहुल गवई यांच्या मार्गदर्शनाखाली प्रकाष्ठ निष्काषण अधिकारी रितेश भोंगाडे आणि वनपरिक्षेत्र अधिकारी निरंजन वैद्य करत आहेत.

वन्यजीव मृत्यूच्या घटनांमध्ये वाढ; संरक्षणाची गरज

भंडारा जिल्ह्यात वन्यजीव मृत्यूच्या घटनांमध्ये वाढ होत असल्याने पर्यावरण प्रेमींमध्ये चिंता वाढली आहे. वाघांच्या अधिवासात अन्न-पाण्याची कमतरता भासत असल्यास वनविभागाने तातडीने उपाययोजना करणे गरजेचे आहे. पुढील तपासानंतर अधिक माहिती समोर येईल.