कर्जत :
कर्जत येथील IBSAR School of Law तर्फे आयोजित ‘संशोधन पेपर सादरीकरण स्पर्धा – २०२६’ नुकतीच उत्साहपूर्ण वातावरणात पार पडली. या स्पर्धेत विधी शाखेच्या विद्यार्थ्यांनी विविध कायदेशीर व सामाजिक विषयांवर सखोल संशोधन सादर करून आपले कौशल्य दाखवले.
या स्पर्धेत रुबी फर्नांडिस (द्वितीय वर्ष, BA LL.B) हिने ‘कृत्रिम बुद्धिमत्ता आणि न्यायालयीन निर्णय प्रक्रिया’ (AI and Judicial Decision Making) या विषयावर प्रभावी सादरीकरण करत प्रथम क्रमांक पटकावला. न्यायव्यवस्थेत कृत्रिम बुद्धिमत्तेचा वाढता वापर आणि त्याचे परिणाम याविषयी तिने सखोल विश्लेषण मांडले.
विकी कुंडलीक जाधव (द्वितीय वर्ष, BA LL.B) याने ‘माहितीचा अधिकार कायदा, २००५ : भारतातील पारदर्शकता आणि प्रशासनाचे एक प्रभावी साधन’ या विषयावरील संशोधन सादर करत द्वितीय क्रमांक मिळवला. माहितीचा अधिकार नागरिकांसाठी प्रशासनात पारदर्शकता निर्माण करण्यासाठी कसा महत्त्वाचा ठरतो, याचे विश्लेषण त्याने मांडले.
तसेच प्रतिज्ञा सुरेश रोकडे (द्वितीय वर्ष, BA LL.B) हिने ‘बालमजुरी आणि सामाजिक-कायदेशीर समस्या’ (Child Labour and Social Legal Issues) या विषयावर सादर केलेल्या संशोधनासाठी तृतीय क्रमांक मिळवला. बालमजुरीच्या समस्येचे सामाजिक व कायदेशीर पैलू तिने प्रभावीपणे मांडले.
स्पर्धेच्या शेवटी संस्थेच्या वतीने सर्व विजेत्या विद्यार्थ्यांचा सत्कार करून त्यांना प्रमाणपत्र व पारितोषिक देण्यात आले. विद्यार्थ्यांमध्ये संशोधनाची आवड निर्माण व्हावी आणि कायद्याच्या क्षेत्रातील गंभीर विषयांवर अभ्यास करण्याची प्रेरणा मिळावी या उद्देशाने अशा उपक्रमांचे आयोजन महत्त्वाचे असल्याचे यावेळी मान्यवरांनी सांगितले.
या स्पर्धेतील यशाबद्दल विजेत्या विद्यार्थ्यांवर महाविद्यालय व परिसरातून अभिनंदनाचा वर्षाव होत आहे.
