कोकण कृषी विद्यापीठ कोणत्या उपाययोजना करणार.
कणकवली (प्रतिनिधी )दि.१० मार्च. सिंधुदुर्ग जिल्ह्यात आंबा व काजू पिकांच्या मोहोराचे मोठ्या प्रमाणात नुकसान झाल्याच्या पार्श्वभूमीवर सिंधुदुर्ग – रत्नागिरीचे खासदार नारायण राणे यांनी डॉ.संजय भावे, कुलगुरू डॉ.बाळासाहेब सावंत कोकण कृषी विद्यापीठ, दापोली यांना पत्र पाठवून याबाबत माहिती मागवली आहे.
सिंधुदुर्ग जिल्ह्यात यावर्षी हवामानातील अनियमित बदल, तापमानातील तीव्र चढ-उतार तसेच विविध कीड-रोगांच्या प्रादुर्भावामुळे आंबा व काजू पिकांचा मोहोर जळून गेल्याचे दिसून येत आहे. त्यामुळे अपेक्षित उत्पादनावर परिणाम झाला असून शेतकरी व आंबा बागायतदारांमध्ये चिंता व्यक्त केली जात आहे.
अनेक शेतकरी व आंबा बागायतदारांनी प्रत्यक्ष भेटून याबाबत खंत व्यक्त केल्याचे खासदार नारायण राणे यांनी पत्रात नमूद केले आहे. आंबा व काजू मोहोर झाडावर जळून जाण्याची नेमकी कारणे काय आहेत, याबाबत माहिती देण्याची मागणी त्यांनी केली आहे. तसेच पुढील वर्षी आंबा व काजूचा मोहोर झाडावर जळून जाऊ नये यासाठी कृषी विद्यापीठामार्फत कोणत्या उपाययोजना करण्यात येणार आहेत, याबाबतही सविस्तर माहिती देण्याची विनंती खासदार राणे यांनी पत्राद्वारे केली आहे.
