.
कायद्याचे उल्लंघन करणाऱ्या मंडळास लोकप्रतिनिधी हस्तक्षेप करणार नाहीत;असा निर्णय…..
प्रतिनिधी-दरिकांत कोळेकर.
कुरुंदवाड :-येथील शहरातील गणेशोत्सवाच्या आगमन व विसर्जन मिरवणुकामध्ये न्यायालय आणि पोलीस प्रशासनाने घालून दिलेल्या ध्वनी मर्यादेतच काढाव्यात. गणेशोत्सवाचा उत्साह कायम ठेवत पर्यावरणपूरक पद्धतीने उत्सव साजरा करावा, असे आवाहन माजी नगराध्यक्ष रामचंद्र डांगे यांनी केले.
कुरुंदवाड पालिकेच्या छत्रपती शिवाजी महाराज सभागृहात सर्व नगरसेवक व पोलीस प्रशासनाची संयुक्त बैठक पार पडली. या बैठकीच्या अध्यक्षस्थानावरून बोलताना डांगे यांनी हे आवाहन केले.पोलीस उपनिरीक्षक जीवन पाटील व नगरसेवक उपस्थित होते.
यावेळी डांगे म्हणाले की, डीजेपासून मुक्त होण्याचे पाऊल पर्यावरण तसेच ज्येष्ठ नागरिकांच्या आरोग्याच्या दृष्टीने महत्त्वाचे आहे. मात्र, यंदाच्या गणेशोत्सवासाठी काही गणेश मंडळांनी डीजे मालकांकडे आधीच संचकार देऊन ठरवाठरवी केली आहे, तर पारंपरिक वाद्यांच्या पथकांचेही इतर ठिकाणी नियोजन झाल्याने ऐनवेळी ते वाद्य उपलब्ध होऊ शकत नाहीत. संपूर्ण महाराष्ट्रात मोठ्या उत्साहात साजऱ्या होणाऱ्या गणेशोत्सवाच्या मिरवणुका वाजत गाजत व्हाव्यात, अशी भक्तांची अपेक्षा असल्याने प्रशासनाने यंदाच्या वर्षापुरती नियमांमध्ये काही प्रमाणात शिथिलता द्यावी, अशी भूमिका त्यांनी मांडली.मात्र, गणेशोत्सवाचा उत्साह कायम ठेवतानाच ध्वनी प्रदूषणासह प्रशासनाने घालून दिलेल्या सर्व नियमांचे काटेकोर पालन करावे, असेही डांगे यांनी स्पष्ट केले.
यावेळी बोलताना पोलीस उपनिरीक्षक पाटील म्हणाले गणेश मंडळांना न्यायालय व प्रशासनाने घालून दिलेल्या नियम व अटींचे पालन करण्याचे आवाहन केले. नियमांचे उल्लंघन होत असल्याचे आढळल्यास संबंधितांवर कायदेशीर कारवाई होऊ शकते. त्यामुळे मंडळ प्रमुखांनी याची गांभीर्याने दक्षता घ्यावी, असा इशारा त्यांनी दिला.
बैठकीत उपस्थित सर्व लोकप्रतिनिधींनीही मंडळांनी कायद्याच्या चौकटीत राहूनच आगमन व विसर्जन मिरवणुका काढाव्यात तसेच इतर सामाजिक उपक्रम राबवावेत,असा निर्णय घेतला आहे. कायद्याचे उल्लंघन झाल्याचे आढळल्यास लोकप्रतिनिधी त्यात कदापि हस्तक्षेप करणार नाहीत, अशी स्पष्ट भूमिका त्यांनी घेतली.
तसेच, भविष्यात कुरुंदवाड शहर डीजेमुक्त करण्याच्या दृष्टीने लोकप्रतिनिधीचा पुढाकार असणार असल्याची घोषणा केली. यावेळी सर्व नगरसेवक नगरसेविका उपस्थित होते.
