पाथरी (प्रतिनिधी) : तालुक्यातील मौजे वडी येथे दरवर्षीप्रमाणे यंदाही श्री सोमेश्वर यात्रेनिमित्त अखंड हरिनाम सप्ताह व संगीत श्रीमद् भागवत कथा ज्ञानयज्ञ सोहळ्याचे भव्य आयोजन करण्यात आले आहे. हा सोहळा २४ मार्च ते ३१ मार्च २०२६ दरम्यान मोठ्या उत्साहात पार पडणार असून परिसरातील भाविकांसाठी आध्यात्मिक पर्वणी ठरणार आहे.
या सोहळ्याचे मार्गदर्शन गणेश महाराज कुटे यांचे लाभत असून श्रीमद् भागवत कथा प्रवक्ते म्हणून अशोकजी महाराज ताल्डे वडीकर उपस्थित राहणार आहेत. सप्ताहाचे हे २९ वे वर्ष असून विविध धार्मिक, भजन, कीर्तन व पारायण कार्यक्रमांची रेलचेल राहणार आहे.
दररोज पहाटे ४ ते ६ काकडा भजन, सकाळी ६ ते ७ विष्णुसहस्त्रनाम, ७ ते ११ ज्ञानेश्वरी पारायण, ११ ते १ गाथा भजन, दुपारी १ ते ४ भागवत कथा, सायंकाळी ६ ते ७ हरिपाठ तसेच रात्री ९ ते ११ हरिकीर्तन व त्यानंतर हरिजागर असे दैनंदिन कार्यक्रम होणार आहेत.
सप्ताहात शिवदास महाराज जंगले, भागवत महाराज नखाते, पांडुरंग महाराज मुंजाळ, अन्सीराम महाराज चव्हाळकर, संतोष महाराज पवार, दीपक महाराज मेटे व रोहिदास महाराज मस्के हे कीर्तनकार आपली सेवा देणार आहेत.
दि. ३० मार्च रोजी भव्य पालखी सोहळ्याचे आयोजन करण्यात आले आहे. तसेच मंगळवार, दि. ३१ मार्च रोजी सकाळी ११ ते १ या वेळेत आळंदी येथील उमेश महाराज दशरथे यांचे काल्याचे कीर्तन होणार असून त्यानंतर महाप्रसादाचे आयोजन करण्यात आले आहे.
या सप्ताहासाठी कुटे पाटील मंडळ यांच्या वतीने महाप्रसादाची व्यवस्था करण्यात आली असून विविध भजनी मंडळे, गावकरी व नवयुवक मित्र मंडळ वडी यांच्या संयुक्त विद्यमाने कार्यक्रमाचे नियोजन करण्यात आले आहे.
या धार्मिक सोहळ्यास परिसरातील भाविकांनी मोठ्या संख्येने उपस्थित राहून कीर्तन, भागवत कथा व महाप्रसादाचा लाभ घ्यावा, असे आवाहन आयोजकांनी केले आहे.
