ठाणे येथे झालेल्या स्पर्धेत उल्लेखनीय कामगिरी; यशवंतराव चव्हाण महाविद्यालय व त्रिमूर्ती स्पोर्ट्स क्लबच्या शिरपेचात मानाचा तुरा
करमाळा, प्रतिनिधी :
ठाणे येथे दि. ३० ऑक्टोबर ते १ नोव्हेंबर या कालावधीत आयोजित करण्यात आलेल्या राज्यस्तरीय शालेय मल्लखांब स्पर्धेत यशवंतराव चव्हाण महाविद्यालय व त्रिमूर्ती स्पोर्ट्स क्लबची मल्लखांब व रोप मल्लखांबपटू कु. अदिती चांदगुडे हिने उल्लेखनीय कामगिरी करत सांघिक कांस्यपदक पटकावले. तिच्या या यशामुळे करमाळ्याच्या क्रीडा क्षेत्रात आनंदाचे वातावरण निर्माण झाले आहे.
या राज्यस्तरीय स्पर्धेत अदितीने आपल्या कौशल्यपूर्ण खेळाचे, जिद्दीचे आणि मेहनतीचे उत्कृष्ट प्रदर्शन केले. तिच्या प्रभावी कामगिरीमुळे संघाच्या यशात मोलाची भर पडली. राज्यस्तरावर सांघिक कांस्यपदक मिळवून तिने आपल्या खेळातील गुणवत्ता सिद्ध केली असून, तिच्या या यशामुळे त्रिमूर्ती स्पोर्ट्स क्लबच्या शिरपेचात मानाचा तुरा रोवला गेला आहे.
अदितीला क्रीडा शिक्षक प्रा. राम काळे सर यांचे मार्गदर्शन, तर प्रशिक्षक सागर शिरसकर सर यांचे मोलाचे प्रशिक्षण लाभले. त्यांच्या मार्गदर्शनाखाली अदितीने सातत्यपूर्ण सराव, शिस्त आणि मेहनतीच्या जोरावर हे यश संपादन केले. या यशामागे तिच्या परिश्रमांसोबतच प्रशिक्षकांचे योग्य मार्गदर्शनही महत्त्वपूर्ण ठरले.
अदितीच्या या उल्लेखनीय यशाबद्दल विद्या विकास मंडळाचे सचिव विलासराव घुमरे, महाविद्यालयाचे प्राचार्य डॉ. ए. पी. माने, उपप्राचार्य अनिल साळुंखे, प्रशासन अधिकारी संभाजी किर्दाक यांच्यासह त्रिमूर्ती स्पोर्ट्स क्लबचे पदाधिकारी, क्रीडाप्रेमी आणि हितचिंतकांनी तिचे अभिनंदन केले.
तसेच अदितीला मार्गदर्शन करणारे प्रा. राम काळे सर आणि प्रशिक्षक सागर शिरसकर सर यांचेही विशेष कौतुक करण्यात आले. अदितीने भविष्यातही अशीच उज्ज्वल कामगिरी करत क्रीडा क्षेत्रात यशाची नवनवी शिखरे गाठावीत, अशा शुभेच्छा यावेळी व्यक्त करण्यात आल्या.
