पाथरी (प्रतिनिधी) : सन 2026-27 साठी घेण्यात आलेल्या जवाहर नवोदय विद्यालय प्रवेश परीक्षेत जि.प. प्रा. शाळा देवनांद्रा साकाप (ता. पाथरी) येथील चार विद्यार्थ्यांनी उल्लेखनीय यश संपादन केले आहे.
या परीक्षेत अर्णव विनोद जुकटे, आदित्य बाबुराव गायकवाड, गौरव रामेश्वर सत्वधर व श्रेयस शामसुंदर बगाटे हे विद्यार्थी पात्र ठरले आहेत. विशेष म्हणजे हे चारही विद्यार्थी सैनिकी स्कूल प्रवेशासाठीही पात्र ठरले आहेत.
गेल्या पाच वर्षांपासून या शाळेने गुणवत्तेची परंपरा कायम राखत उत्कृष्ट निकाल दिला आहे. मागील पाच वर्षांत या शाळेतील तब्बल २५ विद्यार्थी जवाहर नवोदय प्रवेशासाठी पात्र ठरले असून ४५ विद्यार्थी शिष्यवृत्तीधारक झाले आहेत. त्यामुळे जिल्ह्यात गुणवत्तापूर्ण शिक्षण देणारी आदर्श शाळा म्हणून या शाळेचे सर्वत्र कौतुक होत आहे.
शाळेच्या या यशाबद्दल मुख्याध्यापक महिपाल, प्रभारी मुख्याध्यापक भागवत तसेच मार्गदर्शक शिक्षक पोपळघट, झांजे, रोकडे, कोळपे यांचे अभिनंदन करण्यात आले. यासोबतच शाळा व्यवस्थापन समितीचे अध्यक्ष बळीराम गायकवाड व सर्व पदाधिकाऱ्यांचेही कौतुक करण्यात आले.
तालुक्याचे गटशिक्षणाधिकारी राठोड व केंद्रप्रमुख सानप सर यांनी शाळेच्या या उल्लेखनीय कामगिरीबद्दल अभिनंदन करून पुढील वाटचालीस शुभेच्छा दिल्या.
