पांढरकवडा प्रतिनिधी: पांढरकवडा येथील मांगुर्डा रोडवरील आशापूरा जिनिंगमध्ये मंगळवारी (दि. २४) दुपारी सुमारे ३ ते ४ वाजताच्या दरम्यान भीषण आग लागल्याची घटना घडली. या आगीत मोठ्या प्रमाणात कापूस जळून खाक झाला असून लाखो रुपयांचे नुकसान झाल्याचा प्राथमिक अंदाज व्यक्त करण्यात येत आहे.
मिळालेल्या माहितीनुसार, जिनिंगमध्ये मोठ्या प्रमाणात कापसाचा साठा होता. यातील एका ढिगातून अचानक धूर निघताना दिसला आणि काही क्षणांतच आगीने विक्राळ रूप धारण केले. आगीचे लोट आकाशात झेपावत असल्याने परिसरात एकच खळबळ उडाली.
घटनेची माहिती मिळताच जिनिंगमधील कामगारांनी आग विझविण्याचा प्रयत्न केला. दरम्यान, वणी, राळेगाव, यवतमाळ आणि घाटंजी येथून अग्निशमन दलाची वाहने तातडीने घटनास्थळी दाखल झाली. अग्निशमन दलाच्या जवानांनी शर्थीचे प्रयत्न करून काही तासांत आगीवर नियंत्रण मिळवले.
मात्र, तोपर्यंत मोठ्या प्रमाणात कापूस जळून नुकसान झाले होते. ही आग डुग्गा वाहनाच्या सायलेन्सरमुळे लागल्याची प्राथमिक चर्चा घटनास्थळी सुरू होती. पुढील तपास सुरू असून नुकसानीचा अचूक अंदाज घेतला जात आहे.
