श्रीगोंदा (प्रतिनिधी): श्रीगोंदा तालुक्यातील काष्टी येथील बबनरावजी पाचपुते विचारधारा ट्रस्ट संचालित परिक्रमा तंत्रनिकेतन महाविद्यालयाने प्लेसमेंटच्या क्षेत्रात ऐतिहासिक यश संपादन करत सन २०२५-२६ मध्ये तब्बल ३६८ विद्यार्थ्यांची विविध नामांकित कंपन्यांमध्ये निवड करून विक्रम नोंदवला आहे. विशेष म्हणजे मेकॅनिकल, इलेक्ट्रिकल आणि सिव्हिल या तिन्ही विभागांना १०० टक्के प्लेसमेंट मिळाले आहे.
महाविद्यालयातील दर्जेदार शिक्षण, आधुनिक सुविधा आणि उत्कृष्ट वसतिगृहामुळे राज्यभरातून विद्यार्थी येथे शिक्षणासाठी येतात. याच गुणवत्तेचा प्रत्यय या यशातून पुन्हा एकदा आला आहे.
या प्लेसमेंट ड्राइव्हमध्ये एस.पी.एम. ऑटोकोम सिस्टिम प्रा. लि. (रांजणगाव), जाबिल सर्किट इंडिया प्रा. लि., झेड एफ स्टेरिंग केअर इंडिया प्रा. लि., फियाट इंडिया ऑटोमोबाईल प्रा. लि., सिएट येडूसेस प्रा. लि., जॉन डीअर इंडिया प्रा. लि. (शिक्रापूर), टाटा ऑटोकॉम्प सिस्टीम प्रा. लि., बजाज ऑटो प्रा. लि. (चाकण), मायक्रोटेक डेव्हलपर लि., आर.पी.जी. प्रा. लि., जनरल इंडस्ट्रियल कंट्रोल प्रा. लि. यांसारख्या नामांकित कंपन्यांनी सहभाग घेतला होता.
विविध टप्प्यांतील मुलाखतींमधून परिक्रमा तंत्रनिकेतनच्या विद्यार्थ्यांनी उत्कृष्ट कामगिरी करत एकूण ३६८ जणांची निवड मिळवली. विद्यार्थ्यांच्या सातत्यपूर्ण परिश्रम, तांत्रिक कौशल्य आणि आत्मविश्वासामुळे हे यश शक्य झाल्याचे महाविद्यालय प्रशासनाने सांगितले.
या यशाबद्दल संस्थेचे संस्थापक माजी मंत्री बबनराव पाचपुते, अध्यक्षा डॉ. प्रतिभाताई पाचपुते, तसेच संस्थेचे पदाधिकारी, प्राचार्य, प्राध्यापक व कर्मचारी वर्ग यांनी विद्यार्थ्यांचे अभिनंदन करून त्यांच्या पुढील वाटचालीस शुभेच्छा दिल्या.
विद्यार्थ्यांच्या या ऐतिहासिक यशामुळे पालकांमध्ये आनंदाचे वातावरण असून महाविद्यालयाच्या शैक्षणिक व प्लेसमेंट परंपरेत आणखी एक मानाचा तुरा रोवला गेला आहे.
