अकोला (प्रतिनिधी): अकोला जिल्ह्यातील आगर मंडळात ‘आपले सरकार’ सेवा केंद्रे तसेच महासेतू केंद्रांची प्रशासनाकडून व्यापक तपासणी मोहीम राबविण्यात आली. नागरिकांना शासनाच्या सेवा पारदर्शक, जलद आणि सुलभ पद्धतीने मिळाव्यात, या उद्देशाने ही कारवाई करण्यात आली.
या मोहिमेत मंडळ अधिकारी टाले यांच्या नेतृत्वाखाली विविध गावांमध्ये सेवा केंद्रांची प्रत्यक्ष पाहणी करण्यात आली. निंभोरा येथील ग्राम महसूल अधिकारी (तलाठी) राऊत तसेच सर सांगवी बु. येथील ग्राम महसूल अधिकारी (तलाठी) पठाण मॅडम यांनी या तपासणीत सहभाग घेतला. कंचनपूर येथील सेतू केंद्रासह इतर गावांतील केंद्रांची तपासणी करून सेवा गुणवत्तेचा सविस्तर आढावा घेण्यात आला.
तपासणीदरम्यान केंद्रांमधील सेवा प्रक्रिया, नागरिकांना दिल्या जाणाऱ्या सुविधांची गुणवत्ता, तसेच आवश्यक कागदपत्रांची पूर्तता यावर विशेष लक्ष केंद्रित करण्यात आले. यावेळी सामाजिक कार्यकर्ते शिवशंकर पाटील हेही उपस्थित होते.
आगर मंडळातील धामना, आगर, पाळोदी, मोरगाव, भाकरे, बादलापूर, कंचनपूर, खांबोरा, भौरद, भोड, नेराट, वैराट, गोपाल खेळ आणि गांधीग्राम या गावांमध्ये ही तपासणी मोहीम राबविण्यात आली.
या कारवाईमुळे सेवा केंद्रांच्या कामकाजात अधिक शिस्त आणि पारदर्शकता येण्यास मदत होणार असून नागरिकांना शासनाच्या सेवा अधिक कार्यक्षमतेने मिळण्यास चालना मिळणार आहे. प्रशासनाने यापुढेही अशा प्रकारच्या तपासण्या सुरू ठेवण्याचे संकेत दिले आहेत.
