अंबाजोगाई (प्रतिनिधी): अंबाजोगाई येथील फातिमा उर्दू माध्यमिक शाळेतील शिक्षिका श्रीमती नाजिया बेगम नुरूल हसन यांनी संस्थाचालकांकडून होत असलेल्या अन्याय व दडपशाहीविरोधात मुख्य कार्यकारी अधिकारी यांच्या कार्यालयासमोर बेमुदत आमरण उपोषण सुरू केले असून या आंदोलनाला आता क्रांतिकारी शिक्षक संघटनेचा पाठिंबा मिळाला आहे.
श्रीमती नाजिया बेगम या आपल्या हक्कांसाठी आणि न्यायासाठी लढा देत असून त्यांच्या या उपोषणामुळे शैक्षणिक व सामाजिक क्षेत्रात खळबळ उडाली आहे. या प्रकरणाची सखोल चौकशी करून संबंधित शिक्षिकेला न्याय मिळावा, अशी मागणी विविध स्तरातून होत आहे.
दरम्यान, क्रांतिकारी शिक्षक संघटनेचे संस्थापक सचिव शाहेद कादरी, अजीज राजा यांच्यासह इतर कार्यकर्त्यांनी उपोषणस्थळी भेट देत नाजिया बेगम यांना ठाम पाठिंबा दर्शविला. यावेळी प्रशासनाने तात्काळ हस्तक्षेप करून अन्यायग्रस्त शिक्षिकेला न्याय द्यावा, अशी मागणी करण्यात आली.
“जोपर्यंत नाजिया बेगम यांना न्याय मिळत नाही, तोपर्यंत हा लढा सुरूच राहील,” असा ठाम निर्धार संघटनेचे संस्थापक सचिव शाहेद कादरी यांनी व्यक्त केला. तसेच, गरज पडल्यास आंदोलन अधिक तीव्र करण्याचा इशाराही देण्यात आला आहे.
या घटनेमुळे शिक्षकांमध्ये असंतोषाचे वातावरण निर्माण झाले असून प्रशासनाने त्वरित योग्य ती कारवाई करावी, अशी मागणी नागरिकांमधून होत आहे.
