परभणी :
परभणी जिल्ह्यातील मानवत तालुक्यात गॅस वितरण व्यवस्थेचा प्रश्न ऐरणीवर आला असून मानवत गॅस एजन्सीसमोर नागरिकांच्या लांबच लांब रांगा लागल्याचे चित्र पाहायला मिळत आहे. सकाळी सात वाजल्यापासून महिला व पुरुष मोठ्या संख्येने रांगेत उभे राहत असून गॅस मिळवण्यासाठी नागरिकांची धावपळ सुरू आहे.
स्थानिक नागरिकांच्या मते, मागील आठ दिवसांपासून गॅस सिलिंडरची टंचाई भासत असून वेळेवर सिलिंडर मिळत नसल्याने दैनंदिन जीवन विस्कळीत झाले आहे. विशेषतः महिलांना मोठा त्रास सहन करावा लागत आहे.
दरम्यान, प्रशासनाकडून गॅसचा कोणताही तुटवडा नसल्याचा दावा करण्यात येत असून नागरिकांनी अफवांवर विश्वास ठेवू नये, असे आवाहन करण्यात आले आहे. मात्र, प्रत्यक्षात एजन्सीसमोर दिसणाऱ्या गर्दीमुळे आणि रांगा पाहता नागरिकांमध्ये संभ्रम आणि नाराजीचे वातावरण निर्माण झाले आहे.
गॅस वेळेवर उपलब्ध न झाल्यामुळे अनेक कुटुंबांमध्ये स्वयंपाकाची अडचण निर्माण झाली असून प्रशासनाने या समस्येकडे गांभीर्याने लक्ष देऊन तात्काळ उपाययोजना करावी, अशी मागणी नागरिकांकडून होत आहे.
