अकोला : एमआयडीसी पोलीस ठाण्यातील डीबी पथकाने गुप्त माहितीच्या आधारे धडाकेबाज कारवाई करत शासन प्रतिबंधित गुटख्याचा साठा जप्त केला. ही कारवाई बीके चौक, कुंभारी रोड, एमआयडीसी क्र. ३ परिसरातील एका किराणा दुकानावर करण्यात आली.
पोलीस पथकाला मिळालेल्या माहितीनुसार संबंधित दुकानात मोठ्या प्रमाणात प्रतिबंधित गुटखा साठवून विक्री केली जात असल्याची माहिती मिळाली होती. त्यानुसार अन्न व औषध प्रशासन विभागाच्या अधिकाऱ्यांसह पोलीस पथकाने संयुक्त छापा टाकला.
दुकानाची झडती घेतली असता सुमारे ९,५६२ रुपयांचा प्रतिबंधित गुटखा आढळून आला. याप्रकरणी दुकानमालक अनिल मिल्काराम चावला (वय ५४, रा. सिंधी कॅम्प, अकोला) याला ताब्यात घेण्यात आले.
अन्न सुरक्षा अधिकारी किशोर हरीभाऊ बोरचाटे यांच्या फिर्यादीवरून आरोपीविरुद्ध भारतीय न्याय संहिता कलम २२३, २७४, २७५, १२३ तसेच अन्न सुरक्षा व मानदे कायदा २००६ अंतर्गत संबंधित कलमांनुसार गुन्हा दाखल करण्यात आला आहे.
ही कारवाई पोलीस अधीक्षक Archit Chandak, अप्पर पोलीस अधीक्षक बी. चंद्रकांत रेड्डी, उपविभागीय पोलीस अधिकारी सुदर्शन पाटील यांच्या मार्गदर्शनाखाली करण्यात आली. तसेच प्रभारी ठाणेदार Ishani Anand यांच्या नेतृत्वाखाली पोहेकॉ विजय अंभोरे, सतीश प्रधान, पो. कॉ. भूषण सोळंके यांनी कारवाई केली.
या प्रकरणाचा पुढील तपास पोलीस उपनिरीक्षक देवीदास फुलउंबरकर करीत आहेत.
