‘वाद नाही, संघर्ष नाही… संवादातून मार्ग’; दोन्ही बाजूंच्या शेतकऱ्यांनी प्रत्येकी ८ फूट जमीन स्वेच्छेने दिली
श्रीगोंदा | प्रतिनिधी : ‘ना वाद, ना संघर्ष… केवळ संवाद, विश्वास आणि शेतकरी हिताची प्रामाणिक भावना’ या तत्त्वातून चिखली (ता. श्रीगोंदा) येथील वर्षानुवर्षे प्रलंबित असलेला गाडेकर मळा ते झरेकर वस्ती हा १.५ किलोमीटरचा शेतपाणंद रस्ता अखेर खुला करण्यात आला आहे. गुरुवार, दि. १९ नोव्हेंबर रोजी प्रशासकीय अधिकारी आणि शेतकऱ्यांच्या उपस्थितीत या रस्त्याच्या प्रत्यक्ष कामाला सुरुवात झाली.
अहिल्यानगरचे अपर जिल्हाधिकारी शैलेश हिंगे आणि आमदार विक्रमसिंह पाचपुते यांच्या मार्गदर्शनाखाली, तसेच शेतपाणंद रस्ता चळवळीचे राज्य समन्वयक दादासाहेब जंगले पाटील यांच्या प्रमुख उपस्थितीत हा उपक्रम यशस्वी झाला. श्रीगोंदा उपविभागीय अधिकारी श्रीकुमार चिंचकर आणि तहसीलदार सचिन डोंगरे यांच्या आदेशानुसार ही कार्यवाही करण्यात आली.
विशेष म्हणजे, या रस्त्यासाठी लगतच्या दोन्ही गटधारक शेतकऱ्यांनी सामंजस्याची भूमिका घेत प्रत्येकी ८ फूट, असे एकूण १६ फूट क्षेत्र स्वेच्छेने उपलब्ध करून दिले. त्यामुळे अनेक वर्षांपासून प्रलंबित असलेला रस्त्याचा प्रश्न मार्गी लागण्यास मदत झाली.
यावेळी क्षेत्रीय समितीचे सह-अध्यक्ष दादासाहेब जंगले पाटील, श्रीगोंदा तालुका समन्वयक ॲड. गोरख कडूस पाटील, तलाठी भूषण कनगरे, बेलवंडी पोलीस ठाण्याचे राजेंद्र भोर, चिखलीचे सरपंच कुलदीप भैय्या कदम, चेअरमन गोरख झेंडे यांच्यासह ठकाजी झरेकर, बाप्पू गाडेकर, बाबा महाराज झेंडे, दत्तात्रय झेंडे महाराज, अंबादास झरेकर, ज्ञानेश्वर झेंडे, साहेबराव गाडेकर, शिवाजी झेंडे, अनिल झेंडे, गणेश झेंडे, महादेव झेंडे, संतोष झेंडे, अभिजित झरेकर आणि इतर शेतकरी बांधव उपस्थित होते.
केवळ संवाद आणि सामंजस्यातून हा रस्ता खुला झाल्याने परिसरातील शेतकऱ्यांनी समाधान व्यक्त केले आहे. रस्ता उपलब्ध झाल्यामुळे शेतीमालाच्या वाहतुकीचा अनेक वर्षांपासूनचा प्रश्न सुटण्यास मदत होणार आहे.









