राज्यातील पहिले खाजगी पशुवैद्यकीय महाविद्यालय काष्टी येथे सुरू

श्रीगोंदा प्रतिनिधी:
तालुक्यातील काष्टी येथील मा. नामदार श्री. बबनराव पाचपुते विचारधारा ट्रस्ट संचलित परिक्रमा शैक्षणिक संकुलात शैक्षणिक वर्ष २०२६–२७ पासून राज्यातील पहिले खाजगी पशुवैद्यकीय (BVSc & AH) महाविद्यालय सुरू करण्यास केंद्र सरकारकडून मान्यता मिळाली आहे. ही माहिती संस्थेचे मुख्य कार्यकारी अधिकारी ॲड. प्रतापसिंह पाचपुते यांनी दिली.

हे महाविद्यालय महाराष्ट्र पशु व मत्स्य विज्ञान विद्यापीठ (MAFSU), नागपूर यांच्याशी संलग्न असणार आहे. महाविद्यालयासाठी आवश्यक असलेले विद्यापीठ संलग्नता पत्र, राज्य शासनाचे ना-हरकत प्रमाणपत्र (NOC) तसेच केंद्र सरकारचे परवानगीपत्र (LOP) प्राप्त झाले असून भारतीय पशुवैद्यकीय परिषद (VCI) यांचीही मान्यता मिळाली आहे.

🎓 ८० विद्यार्थ्यांना प्रवेश
या महाविद्यालयात प्रारंभी ८० विद्यार्थ्यांना प्रवेश देण्यात येणार आहे. महाविद्यालय सुरू करण्यापूर्वी संस्थेच्या प्रतिनिधींनी देश-विदेशातील विविध शासकीय व खाजगी महाविद्यालयांना भेटी देऊन अभ्यास केला आहे.

🏫 अत्याधुनिक सुविधा उपलब्ध
महाविद्यालयात विद्यार्थ्यांसाठी—

• अनुभवी प्राध्यापक व कर्मचारी वर्ग
• प्रशस्त स्वतंत्र इमारत
• सुसज्ज ग्रंथालय व अत्याधुनिक प्रयोगशाळा
• आधुनिक पशुचिकित्सा दवाखाना
• मुला-मुलींसाठी स्वतंत्र वसतिगृह
• क्रीडांगण व बस सुविधा

अशा सर्व सोयी-सुविधा उपलब्ध करून देण्यात आल्या आहेत.

📚 परिक्रमा संकुलाची शैक्षणिक परंपरा
परिक्रमा शैक्षणिक संकुलामध्ये यापूर्वीच CBSE शाळा, तंत्रनिकेतन, फार्मसी, अभियांत्रिकी, व्यवस्थापन, BBA, BCA, MCA, विधी महाविद्यालय तसेच कनिष्ठ व वरिष्ठ महाविद्यालये कार्यरत आहेत. आता पशुवैद्यकीय महाविद्यालयाच्या स्थापनेमुळे ग्रामीण व शहरी भागातील विद्यार्थ्यांना मोठी शैक्षणिक संधी उपलब्ध होणार आहे.