नांदेड | प्रतिनिधी
कुंडलवाडी शहरातील लघुउद्योग व्यावसायिकांची नुकतीच एक महत्त्वपूर्ण बैठक पार पडली. या बैठकीत सर्वानुमते माजी उपनगराध्यक्ष डॉ. विठ्ठल कुडमूलवार यांची लघुउद्योग संघर्ष समितीच्या अध्यक्षपदी बिनविरोध निवड करण्यात आली.
यावेळी उपाध्यक्षपदी माजी नगरसेवक सुरेश कोंडावार, तर सचिवपदी संतोष करपे यांची निवड करण्यात आली. नव्याने निवड झाल्यानंतर डॉ. कुडमूलवार यांनी लघुउद्योग व्यावसायिकांच्या विविध समस्यांवर ठोस उपाययोजना करण्यासाठी आपण कटिबद्ध असल्याची ग्वाही दिली.
या संघर्ष समितीच्या स्थापनेमागे शहरातील मुख्य बाजारपेठेतील प्रश्न महत्त्वाचा ठरला आहे. काही वर्षांपूर्वी नगरपालिकेने मोठे शॉपिंग कॉम्प्लेक्स उभारले होते. त्यावेळी येथील लघुउद्योजकांना पर्यायी जागा देण्यात आली होती. मात्र सध्या त्या पर्यायी जागेवरून दुकानदारांना हटवून बाजार मैदानात सीसी रोडचे बांधकाम करण्याचा प्रशासनाचा विचार असल्याची माहिती समोर आली आहे.
यामुळे लघुउद्योजकांमध्ये अस्वस्थता निर्माण झाली असून, आपल्या उपजीविकेवर गदा येण्याची भीती व्यक्त करण्यात येत आहे. दुकाने हटविल्यास व्यवसाय पूर्णपणे बंद पडण्याची शक्यता असल्याने व्यापाऱ्यांनी एकत्र येत संघर्ष समिती स्थापन केली आहे.
नगरपालिका प्रशासनाने रस्त्याचे बांधकाम करताना दुकानदारांना न हटवता पर्यायी मार्ग काढावा, अशी मागणी या समितीकडून करण्यात आली आहे. अन्यथा अन्यायाविरोधात लढा उभारण्याचा इशाराही बैठकीत देण्यात आला.
या बैठकीस कुंडलवाडी शहरातील लघुउद्योजक मोठ्या संख्येने उपस्थित होते.
