धाराशिव प्रतिनिधी दि ०९ जि. धाराशिव शहरात बेकायदेशीर वैद्यकीय व्यवसाय करणाऱ्या एका तथाकथित डॉक्टरविरोधात गंभीर गुन्हा दाखल करण्यात आला आहे. या घटनेमुळे शहरात मोठी खळबळ उडाली असून रुग्णांच्या सुरक्षिततेचा प्रश्न पुन्हा ऐरणीवर आला आहे.
पोलीसांनी दिलेल्या माहितीनुसार, आरोपी डॉ. देवाशीष दास (बंगाली), रा. गणेशनगर, धाराशिव यांनी दि. 29 मार्च 2026 रोजी सुमारे दुपारी 3.25 वाजता देशपांडे स्टॅन्ड परिसरातील नेहरू चौक येथे कोणतीही वैध मान्यता नसताना वैद्यकीय व्यवसाय सुरू ठेवला होता. संबंधित आरोपीकडे महाराष्ट्र कौन्सिल ऑफ इंडियन मेडिसीन (MCIM) ची कोणतीही मान्यता नसताना तो रुग्णांवर उपचार करत असल्याचे उघड झाले आहे.
या प्रकरणी डॉ. उन्मेश संतराम सेलुकर (वय 46), शासकीय वैद्यकीय अधिकारी, उपजिल्हा रुग्णालय धाराशिव यांनी दि. 7 एप्रिल 2026 रोजी फिर्याद दिली. या फिर्यादीच्या आधारे धाराशिव शहर पोलीस ठाण्यात आरोपीविरोधात गुन्हा नोंदवण्यात आला आहे.
पोलीसांनी आरोपीवर भारतीय न्याय संहिता (BNS) कलम 318(4), 319(2), 279, 125 तसेच वैद्यकीय व्यवसाय अधिनियमातील कलम 33, 33(1), 33(2)(अ) अंतर्गत गुन्हा दाखल केला आहे.
प्राथमिक तपासात असे समोर आले आहे की, आरोपीने बेकायदेशीररित्या वैद्यकीय व्यवसाय करून शासनाची तसेच सर्वसामान्य रुग्णांची फसवणूक केली. इतकेच नव्हे तर, योग्य पात्रता नसताना उपचार केल्यामुळे रुग्णांच्या जीवितास गंभीर धोका निर्माण झाला होता.
या कारवाईनंतर शहरातील इतर बेकायदेशीर डॉक्टरांमध्ये घबराट पसरली असून, प्रशासनाने अशा बनावट डॉक्टरांवर कठोर कारवाई करण्याचे संकेत दिले आहेत.
नागरिकांना आवाहन:
उपचार घेताना संबंधित डॉक्टरकडे वैध नोंदणी व परवाना आहे का, याची खात्री करूनच उपचार घ्यावेत, असे आवाहन आरोग्य विभागाकडून करण्यात आले आहे.
