शिगाव,
बोईसर : वाढवण बंदर (ग्रीनफिल्ड महामार्ग) प्रकल्पांतर्गत संपादित झालेल्या जमिर्नीचे ७/१२ अधिकार अभिलेख अद्ययावत करण्यासाठी सोमवारी शिगाव-खुताड येथील ग्रुप ग्रामपंचायत सभागृहात विशेष शिबिराचे आयोजन करण्यात आले. तसेच राणीशिगाव व नेवाळे येथेही दुसरे शिबिर आयोजित करण्यात आले. शिगाव, गारगाव, खुताड, सुमडी, राणीशिगाव व नेवाळे या गावांतील भूधारकांनी मोठ्या संख्येने उपस्थित राहून आपल्या कागदपत्रांची छाननी करून घेतली व अभिलेख दुरुस्तीची प्रक्रिया पूर्ण केली. या शिबिरात उपजिल्हाधिकारी तथा उपसंकलक (पुनर्वसन) तेजस चव्हाण यांनी प्रत्यक्ष उपस्थित राहून ग्रामस्थांना मार्गदर्शन केले. जमिनीच्या नोंदी अद्ययावत
करण्याची प्रक्रिया, आवश्यक कागदपत्रे आणि शंका निरसन याबाबत त्यांनी सविस्तर माहिती दिली. यावेळी बोईसर मंडळ अधिकारी विजय गुंडकर, महसूल विभागातील इतर अधिकारी तसेच शिगाव ग्रामपंचायतीच्या
लोकनियुक्त सरपंच दीप्ती दीपक सुमाडा, ग्रामपंचायत सदस्य व ग्रामस्थ उपस्थित होते. सकाळी ११ ते सायंकाळी ५ या वेळेत पार पडलेल्या या शिबिरामुळे संबंधित गावांतील नागरिकांना मोठा दिलासा मिळाल्याचे दिसून आले. या उपक्रमामुळे भूधारकांना विविध शासकीय कार्यालयांची पायपीट टाळून एकाच ठिकाणी कागदपत्रांची पूर्तता व नोंदी दुरुस्तीची सुविधा उपलब्ध झाली असून प्रशासनाच्या या प्रयत्नाचे नागरिकांकडून स्वागत करण्यात आले.
