धर्माच्या भिंती ओलांडून माणुसकीचे दर्शन: भाजी विक्रेता शारुक शाहने जपला सामाजिक सलोखा*

सेलू.. तालुका प्रतिनिधी….
शंकर पानबुडे
नुकताच मुस्लीम बांधवांचा पवित्र रमजान महिना आणि ईदचा सण मोठ्या उत्साहात संपन्न झाला. या सणाचे औचित्य साधत देशभरात सामाजिक सलोखा आणि बंधुभाव जोपासण्यासाठी इफ्तार पार्ट्यांचे आयोजन केले जाते. मात्र, घोराड येथील एका सामान्य भाजी विक्रेत्याने दाखवलेली माणुसकीची कृती सध्या परिसरात चर्चेचा आणि कौतुकाचा विषय ठरली आहे.

घोराड (सेलू) येथील शारुक शाह या तरुणाने धर्मापलीकडे जात, केळझर येथील धम्मभूमीतील श्रामनेर विद्यार्थ्यांना शिरखुरमा आणि भोजन स्वखर्चातून दिले.
शारुक शाह हा तरुण बाजारात भाजी विकून आपला उदरनिर्वाह करतो. आपली कमाई मर्यादित असतानाही, त्याने समाजासमोर एक आदर्श ठेवण्याचा संकल्प केला. केवळ सण साजरा न करता, तो आनंद इतर धर्मीय बांधवांसोबत आणि विद्यार्थ्यांसोबत वाटून घेण्याचा निर्णय त्याने घेतला.
केळझर येथील धम्मभूमीमध्ये श्रामनेर विद्यार्थ्यांना त्याने मोठ्या आपुलकीने शिरखुर्मा वितरित केला आणि सर्वांना भोजन दिले. आजच्या काळात जिथे धर्माच्या नावाने भिंती उभ्या केल्या जात आहेत, तिथे शारुक सारख्या सामान्य तरुणाने घेतलेला हा पुढाकार ‘माणुसकी हाच खरा धर्म’ असल्याचे सिद्ध करतो.

बॉक्स :
“आपण ज्या समाजात राहतो, तिथे सर्व धर्माच्या लोकांनी गुण्यागोविंदाने राहावे. माझ्या छोट्याशा प्रयत्नाने जर कुणाच्या चेहऱ्यावर आनंद येत असेल आणि बंधुत्वाची भावना वाढत असेल, तर तेच माझे खरे भाग्य आहे.”
शारुक शाह
शारुकच्या या निस्वार्थ सेवेचे आणि दातृत्वाचे संपूर्ण परिसरातून कौतुक होत असून, सोशल मीडियावरही त्याच्यावर कौतुकाचा वर्षाव होत आहे. एका भाजी विक्रेत्याने आपल्या कष्टाच्या पैशातून समाजाला दिलेला हा बंधुत्वाचा संदेश नक्कीच प्रेरणादायी आहे.