शहादा,दि.०९(प्रतिनिधी)
शहादा बसस्थानक परिसरात गुरुवार दि. ९ एप्रिल रोजी दुपारी शाळा सुटण्याच्या वेळेस विद्यार्थिनींच्या दोन गटांत जोरदार राडा झाल्याची घटना घडली. या वादात एका ‘दबंग’ महिलेने उडी घेत एका विद्यार्थिनीला मारहाण केल्याने परिसरात काही काळ तणावाचे वातावरण निर्माण झाले होते. अखेर पोलिसांनी घटनास्थळी धाव घेत संबंधितांना ताब्यात घेतले.
मिळालेल्या माहितीनुसार शहादा शहरात ग्रामीण भागातून शिक्षणासाठी येणाऱ्या विद्यार्थिनींची दुपारी बसस्थानक परिसरात मोठी गर्दी होती. यावेळी कोणत्या तरी कारणावरून दोन विद्यार्थिनींमध्ये शाब्दिक चकमक उडाली. या वादाचे रूपांतर बघता बघता हाणामारीत झाले. तितक्यात एका महिलेने या वादात प्रवेश केला आणि तिचा ‘रुद्र अवतार’ पाहायला मिळाला. या महिलेने एका विद्यार्थिनीला मारहाण करण्यास सुरुवात केली.
हा प्रकार पाहून बसस्थानकातील प्रवासी थक्क झाले. वाद नेमका कशामुळे सुरू आहे, हे कोणालाही समजत नव्हते. त्या महिलेचा आक्रमक पवित्रा पाहून मध्यस्थी करण्यासाठी कोणीही पुढे येण्याचे धाडस दाखवत नव्हते. बसस्थानकातील हा गोंधळ पाहून एका सुज्ञ नागरिकाने तत्काळ पोलीस ठाण्यात फोन करून माहिती दिली. माहिती मिळताच पोलीस व्हॅन कर्मचाऱ्यांसह घटनास्थळी दाखल झाली. खाकी गणवेश दिसताच मारहाण करणाऱ्यांचा जोर ओसरला. पोलिसांनी तत्काळ संबंधितांना पोलीस व्हॅनमध्ये बसवून पोलीस ठाण्यात नेले.पोलीस स्टेशनमध्ये नेल्यानंतर पोलिसांनी संबंधित मुलींच्या पालकांना व नातलगांना पाचारण केले. सामोपचाराने चर्चा घडवून आणत पोलिसांनी या प्रकरणावर पडदा टाकला. मात्र, या सर्व भानगडीचे मूळ कारण काय होते, हे संध्याकाळपर्यंत समजू शकले नाही.
सुरक्षेचा प्रश्न ऐरणीवर: सीसीटीव्ही सुरू आहेत का?-
शहादा बसस्थानकात शाळा-महाविद्यालये भरण्याच्या आणि सुटण्याच्या वेळेत हजारो विद्यार्थ्यांची गर्दी असते. अशा वेळी येथे कायमस्वरूपी पोलीस बंदोबस्त असणे गरजेचे आहे, अशी मागणी नागरिकांनी केली आहे. तसेच बसस्थानकात सुरक्षिततेसाठी लावलेले सीसीटीव्ही कॅमेरे सुरू आहेत का? असा प्रश्न उपस्थित केला जात आहे.जर कॅमेरे सुरू असतील, तर या घटनेचे फुटेज तपासून पोलिसांनी दोषींवर कडक कारवाई करावी, अशी प्रतिक्रिया प्रत्यक्षदर्शींनी व्यक्त केली आहे.
वारंवार होणाऱ्या अशा घटनांमुळे बसस्थानक परिसर असुरक्षित बनत चालल्याने पालकांमध्ये चिंतेचे वातावरण आहे. प्रशासन यावर काय ठोस पावले उचलते, याकडे सर्वांचे लक्ष लागले आहे.
