नांदेड जिल्ह्यात मागील तीन दिवसांत पाच खूनांच्या घटना ताज्या असतानाच हिमायतनगर येथे पुन्हा एकदा दोन गटांमध्ये जोरदार हाणामारी झाल्याची घटना घडली आहे. पैशांच्या व्यवहारावरून सुरू झालेला वाद चिघळत जाऊन दोन्ही गटांमध्ये संघर्ष झाला. यावेळी तलवारीने एकमेकांवर हल्ला करण्यात आल्याने परिसरात भीतीचे वातावरण निर्माण झाले.
या घटनेत तीन जण गंभीर जखमी झाल्याची माहिती समोर आली आहे. तसेच या प्रकरणात काँग्रेसच्या एका नगरसेवकाचा सहभाग असल्याचा प्राथमिक अंदाज व्यक्त केला जात आहे. जखमींना तातडीने ग्रामीण रुग्णालयात दाखल करण्यात आले असून, त्यापैकी दोघांची प्रकृती चिंताजनक असल्याने पुढील उपचारासाठी नांदेड येथे हलविण्यात आले आहे. या घटनेचा पुढील तपास हिमायतनगर पोलीस करत आहेत.
