पुरंदर : प्रतिनिधी
पुरंदर तालुक्यातील सासवड येथे विश्वरत्न डॉ. बाबासाहेब आंबेडकर यांच्या १३५ व्या जयंतीनिमित्त भव्य संयुक्त जयंती महोत्सवाचे आयोजन करण्यात आले असून, विविध क्षेत्रात उल्लेखनीय कार्य करणाऱ्या मान्यवरांना पुरस्कार जाहीर करण्यात आले आहेत. पुरंदर तालुका बहुजन महापुरुष संयुक्त जयंती महोत्सव समितीच्या वतीने हा सोहळा मंगळवार, दि. १४ एप्रिल २०२६ रोजी सासवड येथील डॉ. बाबासाहेब आंबेडकर उद्यानात पार पडणार आहे.
या संयुक्त जयंती सोहळ्यात गौतम बुद्ध, छत्रपती शिवाजी महाराज, महात्मा ज्योतिबा फुले, राजर्षी शाहू महाराज यांसह विविध महापुरुषांच्या जयंतीचा उत्सव एकत्र साजरा करण्यात येणार आहे. या निमित्ताने सामाजिक, प्रशासकीय, पोलीस, बँकिंग व उद्योग क्षेत्रातील कार्यकर्त्यांचा गौरव करण्यात येणार आहे.
यावर्षीच्या पुरस्कारांमध्ये माहूर येथील आदर्श शिक्षक आनंदराव घोरपडे यांना “डॉ. बाबासाहेब आंबेडकर समाजभूषण पुरस्कार”, काळदरी येथील माजी तहसीलदार सी. एम. यादव यांना “आदर्श प्रशासकीय सेवा पुरस्कार”, हरगुडे येथील शैलेश धिवार यांना “आदर्श पोलीस अधिकारी पुरस्कार”, पिंपळे येथील विजय कांबळे यांना “आदर्श बँक अधिकारी पुरस्कार” जाहीर करण्यात आले आहेत. तसेच सुपे खुर्द येथील उद्योजक अविनाश जगताप, सोनोरी येथील भाऊसाहेब सोनवणे आणि सिंगापूर येथील आबासाहेब वाघमारे यांना “उद्योगरत्न पुरस्कार” देऊन गौरविण्यात येणार आहे.
या कार्यक्रमास पुरंदर-हवेली मतदारसंघातील आजी-माजी आमदार, सासवड नगरपालिकेच्या नगराध्यक्षा आनंदीकाकी जगताप, पंचायत समितीचे सभापती अमित झेंडे, उपसभापती, जिल्हा परिषद सदस्य, नगरसेवक तसेच विविध राजकीय व सामाजिक संघटनांचे पदाधिकारी मोठ्या संख्येने उपस्थित राहणार आहेत. कार्यक्रमाचे अध्यक्षस्थान जयंती महोत्सव समितीचे विश्वस्त अॅड. सुनिलतात्या धिवार भूषविणार असून स्वागताध्यक्षपदी नगरसेवक सोपान रणपिसे असणार आहेत.
“चलो बुद्धं की ओर” या संकल्पनेवर आधारित प्रबोधनपर व्याख्यानासाठी धम्मप्रचारक प्रबुद्ध साठे यांना निमंत्रित करण्यात आले आहे. कार्यक्रमाचे प्रास्ताविक विष्णूदादा भोसले करणार असून सूत्रसंचालन कैलास धिवार, सुनिल जगताप व डॉ. विनायक गायकवाड करणार आहेत. धार्मिक विधी भारतीय बौद्ध महासभेच्या मार्गदर्शनाखाली पार पडणार असून आभार प्रदर्शन शशीभाऊ गायकवाड, राहुल गायकवाड, अनिल कांबळे व अशोक गायकवाड करणार आहेत.
कार्यक्रम तीन सत्रांमध्ये पार पडणार असून सकाळी १० वाजता महापुरुषांच्या पुतळ्यांना पुष्पहार अर्पण व ध्वजारोहण, सकाळी ११ ते १ प्रबोधन सभा, दुपारी १ ते २ भोजन, तर दुपारी २ ते सायंकाळी ५ या वेळेत चेतना आर्ट्स प्रस्तुत चंद्रकांत चव्हाण यांच्या भीमगीतांच्या जल्लोषमय कार्यक्रमाचे आयोजन करण्यात आले आहे.
या भव्य सोहळ्यास शिव, शाहू, फुले, आंबेडकर विचारधारेवर कार्य करणाऱ्या सर्व नागरिकांनी, भिमसैनिकांनी व विविध क्षेत्रातील मान्यवरांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन महोत्सव समितीचे विश्वस्त बळीराम सोनवणे, अमोल जगताप, सुधीर शेलार, योगेश घोरपडे, कालीदास उबाळे, सचिन कांबळे, स्वप्नील पाटोळे, सुहास बेंगाळे, अतुल भोसले व श्रीधर गायकवाड यांनी केले आहे.
