अंबाजोगाई (प्रतिनिधी)
गोवा राज्याची राजधानी पणजी येथे आयोजित राष्ट्रकुल संसदीय संघ (CPA) भारत क्षेत्र – ७ (पश्चिम विभाग) वार्षिक परिषदेत अंबाजोगाईच्या आमदार नमिताताई मुंदडा यांनी सक्रिय सहभाग नोंदवत विधायक चर्चांमधून महत्त्वपूर्ण अनुभव घेतला. ८ ते १० एप्रिल २०२६ या कालावधीत पार पडलेल्या या परिषदेत गोवा, महाराष्ट्र आणि गुजरात राज्यांतील निवडक लोकप्रतिनिधी सहभागी झाले होते.
या परिषदेत “विकसित भारत – २०४७” या ध्येयाच्या पार्श्वभूमीवर युवा लोकप्रतिनिधींची भूमिका, तसेच व्यापार, पर्यटन, नागरीकरण, पर्यावरण आणि तटीय संपर्कयंत्रणा यांसारख्या विषयांवर सखोल विचारमंथन करण्यात आले. या चर्चांमुळे भविष्यातील धोरणात्मक दिशा स्पष्ट करण्यास मदत झाली असल्याचे नमिताताई मुंदडा यांनी सांगितले.
देशभरातील मोजक्या आमदारांमध्ये निवड होऊन या परिषदेत सहभागी होण्याची संधी मिळाल्याचा अभिमान व्यक्त करत, या व्यासपीठावरून मिळालेल्या ज्ञानाचा उपयोग आपल्या मतदारसंघाच्या विकासासाठी आणि प्रभावी जनप्रतिनिधित्वासाठी करण्यात येईल, असा विश्वास त्यांनी व्यक्त केला.
या परिषदेस ओम बिर्ला, हरिवंश सिंह, प्रमोद सावंत, हरविंदर कल्याण, गणेश गावकर, यू. टी. खादर फरीद, चिंताकायला अय्यन्ना पात्रुडू, जोशुआ डी’सूझा, राम शिंदे, नीलम गोऱ्हे आणि अण्णासाहेब बनसोडे यांसह विविध राज्यांतील मान्यवरांची उपस्थिती लाभली.
परिषदेत झालेल्या चर्चांमुळे राज्यांच्या समन्वयातून विकासाला गती देण्यासाठी आवश्यक असलेल्या धोरणांवर भर देण्यात आला. या अनुभवातून नव्या संकल्पना आणि दृष्टिकोन आत्मसात करत, त्याचा उपयोग स्थानिक पातळीवर करण्याचा निर्धार आमदार नमिताताई मुंदडा यांनी व्यक्त केला.
