मारेगाव : प्रतिनिधी
मारेगाव तालुक्यातील मार्डी सर्कल अंतर्गत कानडा गावात एक अत्यंत दुर्दैवी घटना घडली असून, सोसाट्याच्या वाऱ्यामुळे रस्त्याच्या कडेला उभे असलेले झाड कोसळून एका वृद्ध महिलेचा जागीच मृत्यू झाला आहे. या घटनेने परिसरात हळहळ व्यक्त केली जात असून गावात शोककळा पसरली आहे.
मिळालेल्या माहितीनुसार, मृत महिलेचे नाव मंजुळाबाई चीडे असे असून त्या मागील आठ वर्षांपासून आपल्या जावयाकडे वास्तव्यास होत्या. घटनेच्या दिवशी त्या काही कारणास्तव घराबाहेर पडल्या असताना गावालगतच्या पांदण रस्त्यावरून जात होत्या. त्याचवेळी जोरदार वाऱ्यामुळे रस्त्याच्या कडेला उभे असलेले शिरसाचे झाड अचानक कोसळून थेट त्यांच्या अंगावर पडले.
या अपघातात मंजुळाबाई चीडे यांच्या डोक्याला गंभीर दुखापत झाली असून त्यांचा जागीच मृत्यू झाला. ही घटना पाहणाऱ्या स्थानिक नागरिकांनी तत्काळ गावात माहिती देत घटनास्थळी धाव घेतली. त्यानंतर मारेगाव पोलिस स्टेशनला याची माहिती देण्यात आली.
घटनेनंतर पोलिसांनी घटनास्थळी पंचनामा करून पुढील तपास सुरू केला असून या प्रकरणाचा तपास पोलीस अधिकारी दिगंबर किनाके करीत आहेत.
या दुर्दैवी घटनेमुळे कानडा गावासह संपूर्ण परिसरात हळहळ व्यक्त केली जात आहे.
