मारेगाव : प्रतिनिधी
मारेगाव तालुक्यातील मार्डी येथे जैन धर्मीय बांधवांकडून भगवान महावीर जयंती मोठ्या उत्साहात साजरी करण्यात आली. अहिंसा आणि सत्याच्या मार्गाचा संदेश देणाऱ्या भगवान महावीर यांच्या जयंतीनिमित्त विविध धार्मिक व सामाजिक कार्यक्रमांचे आयोजन करण्यात आले होते.
पिता सिद्धार्थ राजा आणि माता त्रिशला यांचे पुत्र असलेल्या भगवान महावीर यांच्या जयंतीनिमित्त गावातून भव्य रॅली काढण्यात आली. ही रॅली अनंता जुमडे यांच्या घराजवळून सुरू होऊन त्रिमूर्ती मंगल कार्यालयापर्यंत नेण्यात आली. रॅलीदरम्यान “भगवान महावीर की जय” अशा घोषणांनी परिसर दणाणून गेला होता.
या रॅलीत लहानांपासून मोठ्यांपर्यंत सर्वच जैन बांधवांनी उत्स्फूर्त सहभाग नोंदवला. पारंपरिक वेशभूषा, शिस्तबद्ध मिरवणूक आणि भक्तिमय वातावरणामुळे कार्यक्रमाला विशेष रंगत आली होती.
संपूर्ण कार्यक्रम अत्यंत नियोजनबद्ध पद्धतीने आणि शांततेत पार पडला. जैन धर्मातील अहिंसा, सत्य आणि संयम या मूल्यांचा प्रचार-प्रसार करण्याचा संदेश या निमित्ताने देण्यात आला.
