मारेगाव : प्रतिनिधी
मारेगाव तालुक्यातील खनिज संपत्तीच्या अवैध उत्खननावर महसूल विभागाने कठोर पावले उचलत मोठ्या प्रमाणावर दंडात्मक कारवाई केली असून, या प्रभावी मोहिमेमुळे महसूल वसुलीत मारेगाव तालुक्याने जिल्ह्यात प्रथम क्रमांक पटकावल्याची माहिती समोर आली आहे.
मारेगाव तालुक्यात एकूण चार सर्कल असून या परिसरात नैसर्गिकरित्या खनिज संपत्ती मुबलक प्रमाणात उपलब्ध आहे. मात्र, काही ठिकाणी या संपत्तीचे अवैध उत्खनन होत असल्याच्या तक्रारी समोर येत होत्या. या पार्श्वभूमीवर महसूल विभागाने आपली यंत्रणा अधिक सक्षम करत व्यापक कारवाई सुरू केली.
मारेगाव शहरापासून सुमारे सात किलोमीटर अंतरावर असलेल्या नरसाळा परिसरात मोठ्या प्रमाणावर खनिज उत्खनन सुरू असल्याचे निदर्शनास आले. महसूल विभागाच्या नोंदीनुसार या भागात एकूण १३ खदानी नोंदविलेल्या असून त्यापैकी केवळ ९ खदानी अधिकृतपणे कार्यरत असल्याचे आढळले. काही ठिकाणी शासनाने दिलेल्या लीज अटींचे उल्लंघन करत अतिरिक्त उत्खनन केल्याचेही मोजमापादरम्यान स्पष्ट झाले.
या अनियमिततेची वर्षअखेरीस पडताळणी करण्यात आल्यानंतर तहसीलदार उत्तम निलावाड यांनी संबंधित अधिकाऱ्यांसोबत बैठक घेतली. त्यानंतर उच्च अधिकाऱ्यांच्या निर्देशानुसार एचडीपीओ आणि अतिरिक्त अधिकाऱ्यांच्या मार्गदर्शनाखाली कठोर दंडात्मक कारवाई करण्याचे आदेश देण्यात आले.
या आदेशानुसार तहसीलदार उत्तम निलावाड यांच्या नेतृत्वाखाली तालुक्यातील थकित महसूल वसुली मोहिम राबवण्यात आली. नियमभंग करणाऱ्या खदानींवर कारवाई करून मोठ्या प्रमाणात महसूल वसूल करण्यात आला. परिणामी, महसूल विभागाची कार्यक्षमता वाढली असून सरकारी खात्याचा महसूल वाढवण्यात यश आले आहे.
या प्रभावी कामगिरीमुळे मारेगाव महसूल विभागाने जिल्ह्यात प्रथम क्रमांक पटकावल्याची माहिती मिळाली असून, या कारवाईचे सर्व स्तरातून कौतुक होत आहे.
