सांगली : प्रतिनिधी
सांगली जिल्ह्यातील कवठे महांकाळ तालुक्यातील खरशिंग गावात अवकाळी पावसासह आलेल्या सोसाट्याच्या वाऱ्यामुळे मोठे नुकसान झाल्याची घटना समोर आली आहे.
खरशिंग येथील दूध उत्पादक शेतकरी अमित पाटील यांच्या मानसरोवर जर्सी फॉर्ममध्ये वाऱ्याच्या जोरामुळे गोठ्याची भिंत कोसळली असून चाप कटरचेही नुकसान झाले आहे. गोठ्यातील जर्सी गायीला किरकोळ खरचटले असल्याची माहिती मिळाली आहे.
वादळी वाऱ्यामुळे विद्युत खांबावरील वायर तुटल्याने परिसरातील वीजपुरवठा खंडित झाला आहे. काल रात्रीपासून वीज नसल्याने पाणीपुरवठाही ठप्प झाला असून जनावरांना पाणी मिळवण्यासाठी शेतकऱ्यांना मोठी अडचण निर्माण झाली आहे.
परिस्थितीमुळे पशुपालक व शेतकऱ्यांचे दैनंदिन कामकाज विस्कळीत झाले असून तातडीने वीजपुरवठा सुरळीत करावा तसेच नुकसानग्रस्त शेतकऱ्यांना मदत मिळावी, अशी मागणी स्थानिकांकडून होत आहे.
