प्रदीप ताजने
पातुर ग्रामीण प्रतिनीधी
पातुर पंचायत समिती अंतर्गत येणाऱ्या शिर्ला ग्रामपंचायतीचे सचिव दिलीप वाहोकार यांच्यावर मनमानी,तसेच कर्तव्यात कसूर केल्याप्रकरणी प्रशासनाने दि.९ एप्रिल रोजी निलंबनाची कारवाई केली आहे.
सूत्रांकडून प्राप्त माहितीनुसार संबंधित अधिकारी यांच्या कडून जिल्हा परिषद सेवा (वर्तणुक) नियम १९६७ चे उल्लंघन केल्याचे प्रथमदर्शनी आढळून आले आहे .यानंतर तात्काळ प्रभावाने निलंबनाची कारवाई करण्यात आली आहे.
या प्रकरणामध्ये संबंधित ग्राम सचिवावर अनेक गभींर आरोप समोर आले आहेत .आशा स्वयंसेविका भरती प्रक्रियेत शासनाच्या नियम व मार्गदर्शक सूचनांचे उल्लंघन सचिवाकडून केल्याचा आरोप आहे .याशिवाय वरिष्ठ अधिकाऱ्यांच्या आदेशांचे पालन न करणे ,कर्तव्यात कसूर करणे आणि प्रशासनिक जबाबदारीत निष्काळजीपणा दाखवणे हेही आरोप नोंदविण्यात आले होते.
विशेष म्हणजे ग्राम पंचायत मध्ये आधीच ३ रोजगार सेवक कार्यरत असताना नियमबाह्य पद्धतीने आणखी ७ ग्राम रोजगार सेवकांची नियुक्ती करण्यासाठी चुकिचा ठराव मंजूर करण्यात आल्याचा धक्कादायक प्रकार उघड झाला आहे .
या कारवाईमुळे जिल्ह्यातील ग्राम पंचायत प्रशासनात पारदर्शकता आणि नियम पालनाबाबत स्पष्ट संदेश गेला असुन अशा प्रकारच्या मनमानी आणि कर्तव्यात कसूर करणार्‍यांवर कठोर कारवाई केली जाईल असे संकेत प्रशासनाने दिले आहेत.
