बातमी :
नालंदा हनुमान नगर गृहनिर्माण संस्थेच्या वतीने झोपडपट्टी पुनर्विकास प्रकरणात गंभीर अनियमिततेचे आरोप करण्यात आले आहेत. अनेक तक्रारी असतानाही Slum Rehabilitation Authority (SRA) प्रशासनाने ९ मार्च २०२६ रोजी GBR (General Body Resolution) आयोजित केल्याने ही मोठी शोकांतिका असल्याचा आरोप करण्यात आला आहे.
संस्थेच्या म्हणण्यानुसार, “नालंदा स्मृती को-ऑपरेटिव हाऊसिंग सोसायटी” या नावाने बनावट कमिटी तयार करण्यात आली. या कमिटीमार्फत जबरदस्तीने व फसवणूक करून नागरिकांच्या बनावट सह्या घेतल्या गेल्या. एवढेच नव्हे, तर ज्यांची घरेच नाहीत किंवा कोणतीही कागदपत्रे नाहीत अशा व्यक्तींची नावेही प्रस्तावात समाविष्ट करण्यात आल्याचा आरोप करण्यात आला आहे.
या संशयास्पद प्रस्तावाच्या आधारावर SRA कडून GBR घेण्यात आला, मात्र यास सोसायटीतील अनेक सदस्यांनी तीव्र विरोध दर्शवला होता. तरीही प्रशासनाने प्रक्रिया पुढे रेटल्याने रहिवाशांमध्ये संताप व्यक्त होत आहे.
नालंदा हनुमान नगर गृहनिर्माण संस्थेच्या वतीने या संपूर्ण प्रकरणाची तातडीने सखोल चौकशी करून दोषींवर कठोर कायदेशीर कारवाई करण्याची मागणी करण्यात आली आहे. तसेच, “घर आमचं हक्काच” आणि “आमचं घर आमचा अधिकार” या घोषणांद्वारे रहिवाशांनी आपला हक्क कायम ठेवण्याचा निर्धार व्यक्त केला आहे.
