तांदळ्याच्या भूमिपुत्राची पुणे पोलिसात निवड; गावासह पुण्यात जल्लोष

बातमी :
श्रीक्षेत्र माहूर : माहूर तालुक्यातील अतिदुर्गम तांदळा गावातील सय्यद सरवर सय्यद हैदर यांची Pune Police मध्ये निवड झाल्याने गावासह पुण्यात आनंदाचे वातावरण निर्माण झाले आहे. त्यांच्या यशाबद्दल पुण्यातील मित्रमंडळ तसेच तांदळा गावातील नातेवाईक व ग्रामस्थांनी जल्लोष साजरा करत अभिनंदन केले.

सय्यद सरवर यांचे वडील सय्यद हैदर सय्यद गणी यांची आर्थिक परिस्थिती अत्यंत हलाखीची होती. रोजगाराच्या शोधात त्यांनी पुणे गाठून बिगारी काम करत कुटुंबाचा सांभाळ केला. कठीण परिस्थितीतही त्यांनी मुलाच्या शिक्षणात खंड पडू दिला नाही.

सरवर यांनी प्राथमिक शिक्षण तांदळा व माहूर येथे घेतले. त्यानंतर सहावी ते दहावी शिक्षण उरुळी कांचन येथील महात्मा गांधी विद्यालयात, तर अकरावी-बारावी शिक्षण पद्मश्री मनीभाई देसाई महाविद्यालयात पूर्ण केले. पुढे त्यांनी पोलीस भरतीची तयारी करत अखेर पुणे पोलिसात निवड मिळवली.

त्यांच्या यशाची बातमी समजताच पुण्यातील मित्रांनी जल्लोषात स्वागत केले. तसेच तांदळा गावातही आजोबा सय्यद गणी, सय्यद अब्दुल, सय्यद नूर, सय्यद नामदार, सय्यद मगदूम, शेख अब्दुल रजाक, शेख मेहबूब, सरपंच प्रतिनिधी संतोष जाधव, आनंदराव दुमारे, गजानन जाधव, प्रभात वानखेडे, शंकर बोरकर यांच्यासह ग्रामस्थांनी आनंदोत्सव साजरा केला.

अतिदुर्गम भागातून संघर्ष करत मिळवलेले हे यश इतर युवकांसाठी प्रेरणादायी ठरत असल्याची भावना यावेळी व्यक्त करण्यात आली.