प्रदीप ताजने
पातुर ग्रामीण प्रतिनिधी
पातुर तालुक्यातील आलेगाव मळसुर फाटा ते गावंडगाव रस्त्याची अवस्था ही अतिशय बिकट झाली असुन त्यावरुन प्रवास करणे जिकीरीचे झाले आहे .याबाबत आलेगाव येथील सामाजिक कार्यकर्ते निलेशभाउ कापकर यांनी सार्वजनिक बांधकाम विभागाकडे वारंवार तक्रारींसह पाठपुरावा करुनही संबंधित विभागाकडून याकडे दुर्लक्ष होत असल्यामुळे त्यांनी आता थेट सार्वजनिक बांधकाम विभागाच्या अकोला येथील कार्यालयासमोर आंदोलन करण्याचा ईशारा दिला आहे.
आलेगाव ते गावंडगाव फाटा रस्त्याची अवस्था एवढी वाईट झाली आहे कि त्यावरुन गाडी चालविताना कसरत करावी लागत आहे.रस्त्यांवर ठिकठिकाणी खड्डे पडले आहेत .या रस्त्यावरून शेतकरी,शाळकरी विद्यार्थ्यांसह व्यापारी यांची नेहमीच ये जा असते खड्डेयुक्त रस्त्यांमुळे प्रवाशांना त्रास होत असुन खड्ड्यांमुळे केव्हाही अपघाताची घटना घडु शकते .विशेषतः आजारी रुग्ण तसेच गरोदर महिलांना या रस्त्यांमुळे कठीण समस्यांचा सामना करावा लागतो.
निवडणूक काळात विकासाच्या गप्पा मारणारे आणि लोकांना खोटी आश्वासने देणारे लोकप्रतिनीधी नतंर लोकांच्या समस्स्यांकडे फिरुन पाहत नाहीत .रस्त्याच्या दुरावस्थेबाबत परिसरातील सामाजिक कार्यकर्ते निलेश कापकर यांनी अनेकवेळा आवाज उठविला असुन याबाबत सार्वजनिक बांधकाम विभागाकडे तक्रारीसह पाठपुरावा केला आहे.याची दखल घेऊन काही दिवसापूर्वी बांधकाम विभागाने रस्त्याच्या काही अंतरापर्यंतचे दुरुस्तीचे काम केले .मात्र या दुरुस्तीच्या कामाबाबत आपण असमाधानी असल्याचे मत त्यांनी व्यक्त केले आहे.त्याचबरोबर येत्या १० मे रोजी सार्वजनिक बांधकाम विभागाच्या अकोला येथील कार्यालयासमोर आंदोलन करण्याचा ईशारा त्यांनी दिला आहे.
“रस्त्याच्या दुरावस्थेबाबत सार्वजनिक बांधकाम विभागाकडे वारंवार तक्रारींसह पाठपुरावा केला आहे मात्र विभागाकडून रस्त्याचे दुरुस्तीचे थातूरमातूर तसेच बोगस कामाचा दिखावा केल्या जात आहे .याबाबत १० मे रोजी सार्वजनिक बांधकाम विभागाच्या कार्यालयासमोर आंदोलन करण्यात येईल “- निलेश कापकर
सामाजिक कार्यकर्ता..
