प्रतिनिधी जोगेंद्र जाधव
कल्याण:
मुरबाड-कल्याण महामार्गावरील रायते पुलावर आज सकाळी ११ वाजेच्या सुमारास एक अत्यंत भीषण अपघात झाला आहे. प्रवाशांनी भरलेली एक जीप आणि मिक्सर डंपर (ट्रक) यांच्यात समोरासमोर जोरदार धडक झाली. या भीषण अपघातात ११ जणांचा जागीच मृत्यू झाला असून परिसरात मोठी खळबळ उडाली आहे.
अपघाताची वेळ: सकाळी अंदाजे ११:०० वाजता.
ठिकाण: कल्याण-मुरबाड रोडवरील रायते गावाजवळील नवीन पूल.
प्रवाशांनी गच्च भरलेली एक जीप समोरून येणाऱ्या मिक्सर ट्रँकरवर जाऊन आदळली. धडक इतकी भीषण होती की जीपचा चक्काचूर झाला आणि ११ प्रवाशांना आपला जीव गमवावा लागला
घटनेची माहिती मिळताच कल्याण तालुका पोलीस आणि टिटवाळा पोलीस तातडीने घटनास्थळी दाखल झाले. पोलिसांनी स्थानिक नागरिकांच्या मदतीने बचावकार्य सुरू केले. मृतांचे देह रायते येथील ग्रामीण रुग्णालयात पाठवण्यात आले आहेत.
अपघातानंतर या मार्गावरील वाहतूक काही काळ विस्कळीत झाली होती, मात्र पोलिसांनी अपघातग्रस्त वाहने बाजूला करून वाहतूक आता सुरळीत केली आहे.
प्राथमिक माहितीनुसार, हा रस्ता अतिशय प्रशस्त असल्याने वाहनांचा वेग जास्त असतो. रस्त्यावर कुठेही गतिरोधक (स्पीड ब्रेकर) नसल्याने चालकाचे नियंत्रण सुटल्यास असे भीषण अपघात घडत असल्याचे स्थानिक प्रतिनिधींनी सांगितले आहे
या अपघातामुळे संपूर्ण परिसरात हळहळ व्यक्त केली जात आहे.
