इंदापूर प्रतिनिधी :
इंदापूर तालुका ग्रामविकास प्रतिष्ठानचे विश्वासराव रणसिंग महाविद्यालय, कळंब (ता. इंदापूर) येथे भारतीय राज्यघटनेचे शिल्पकार, महामानव डॉ. बाबासाहेब आंबेडकर यांच्या जयंतीनिमित्त अभिवादन कार्यक्रम अत्यंत उत्साहात पार पडला.
कार्यक्रमाच्या प्रारंभी प्राचार्य डॉ. अशोक काळंगे यांनी डॉ. बाबासाहेब आंबेडकर यांच्या प्रतिमेस पुष्पहार अर्पण करून अभिवादन केले. यावेळी उपप्राचार्य प्रशांत शिंदे, उपप्राचार्य ज्ञानेश्वर गुळीग तसेच प्राध्यापक व प्राध्यापकेत्तर कर्मचारी मोठ्या संख्येने उपस्थित होते.
कार्यक्रमात मार्गदर्शन करताना प्राचार्य डॉ. अशोक काळंगे यांनी बाबासाहेबांच्या जीवनकार्याचा सविस्तर आढावा घेतला. त्यांनी शिक्षण, समता, बंधुता आणि सामाजिक न्यायासाठी बाबासाहेबांनी केलेल्या संघर्षाचे महत्त्व अधोरेखित केले. “शिका, संघटित व्हा आणि संघर्ष करा” हा संदेश विद्यार्थ्यांनी आपल्या जीवनात अंगीकारावा, असे आवाहन त्यांनी केले.
उपप्राचार्य ज्ञानेश्वर गुळीग यांनी आपल्या मनोगतातून बाबासाहेबांच्या पत्रकारितेतील योगदानावर प्रकाश टाकला. समाजातील वंचित व शोषित घटकांचा आवाज बुलंद करण्यासाठी बाबासाहेबांनी पत्रकारितेचा प्रभावी वापर केल्याचे त्यांनी सांगितले. यावेळी “मूकनायक” आणि “बहिष्कृत भारत” या वृत्तपत्रांच्या माध्यमातून त्यांनी केलेल्या सामाजिक प्रबोधन व जनजागृतीचे महत्त्वही स्पष्ट करण्यात आले.
कार्यक्रमाला उपस्थित मान्यवर, शिक्षक व कर्मचारी यांनी बाबासाहेबांना अभिवादन करून त्यांच्या विचारांचा प्रसार करण्याचा संकल्प व्यक्त केला.
