आजरा हायस्कूलच्या वेदिका पोतदारची ‘इस्त्रो’ अभ्यास दौऱ्यासाठी निवड

आजरा (प्रतिनिधी) : भारतीय अंतराळ संशोधन संस्था ISRO मार्फत राबविण्यात येणाऱ्या ‘युवक वैज्ञानिक कार्यक्रम’ (युविका) अंतर्गत देशपातळीवरील निवड प्रक्रियेत आजरा हायस्कूलची विद्यार्थिनी कुमारी वेदिका विजय पोतदार हिने उल्लेखनीय यश संपादन केले आहे. तिची तामिळनाडू येथील Mahendragiri Aerospace Centre येथे होणाऱ्या अभ्यास दौऱ्यासाठी निवड झाली असून, तिच्यावर सर्वत्र कौतुकाचा वर्षाव होत आहे.

दरवर्षी विद्यार्थ्यांमध्ये अंतराळ विज्ञानाविषयी आवड निर्माण करण्यासाठी ‘युविका’ हा महत्त्वाकांक्षी उपक्रम राबवला जातो. यासाठी देशभरातून लाखो विद्यार्थी अर्ज करतात. यावर्षी अत्यंत कठीण निवड प्रक्रियेनंतर केवळ ४५६ विद्यार्थ्यांची निवड करण्यात आली असून, त्यामध्ये वेदिका पोतदार हिने आपल्या गुणवत्तेच्या जोरावर स्थान मिळवून शाळा आणि तालुक्याचा नावलौकिक वाढवला आहे.

१० ते २२ मे दरम्यान अभ्यास दौरा
हा अभ्यास दौरा १० मे ते २२ मे दरम्यान पार पडणार असून, या कालावधीत विद्यार्थ्यांना अंतराळ विज्ञान, रॉकेट तंत्रज्ञान आणि उपग्रह प्रक्षेपणाबाबत प्रत्यक्ष शास्त्रज्ञांकडून मार्गदर्शन मिळणार आहे.

सर्व स्तरांतून शुभेच्छांचा वर्षाव
वेदिकाच्या या यशाबद्दल जनता शिक्षण संस्थेचे अध्यक्ष अशोक अण्णा चराटी, संचालक मंडळ, सल्लागार समिती तसेच शाळेचे मुख्याध्यापक श्री. ए. एल. तोडकर, उपमुख्याध्यापिका सौ. एच. एस. कामत, पर्यवेक्षक श्री. ए. आर. व्हस्कोटी, सर्व शिक्षक व शिक्षकेत्तर कर्मचारी यांनी अभिनंदन करून पुढील वाटचालीस शुभेच्छा दिल्या.

ग्रामीण भागातील विद्यार्थिनीने थेट अंतराळ संशोधन संस्थेपर्यंत भरारी घेतल्याने परिसरात अभिमानाचे वातावरण निर्माण झाले असून, इतर विद्यार्थ्यांसाठीही ही प्रेरणादायी बाब ठरली आहे.