बेल्हा (ता. जुन्नर) : बेल्हा येथील ग्रामदैवत Shri Muktabai Temple येथे पहाटेच्या सुमारास अज्ञात चोरट्यांनी मंदिरात घुसून देवीच्या अंगावरील दागिने चोरण्याचा प्रकार उघडकीस आला आहे. या घटनेमुळे परिसरात खळबळ उडाली आहे.
मिळालेल्या माहितीनुसार, चोरट्यांनी मंदिराच्या मागील बाजूची खिडकीचे ग्रील तोडून आत प्रवेश केला. त्यानंतर वीजपुरवठा खंडित करत कुलूप तोडून मंदिराच्या आवारात शिरले. दुसऱ्या चोरट्याने मागील बाजूचे शटर तोडून आत प्रवेश केला. पुढे गाभाऱ्याचे कुलूप तोडून त्यांनी देवीच्या मूर्तीवरील मंगळसूत्र काढून घेतले तसेच कपाटातील सामानही अस्ताव्यस्त केले.
वीजपुरवठा बंद केल्यामुळे सायरन वाजला नाही; मात्र इन्व्हर्टर सुरू असल्याने चोरटे सीसीटीव्ही कॅमेऱ्यात कैद झाले आहेत. चोरीला गेलेले मंगळसूत्र हे बेंटेक्सचे असल्याची माहिती समोर आली आहे.
घटनेनंतर देवस्थानचे पदाधिकारी व पोलिसांनी घटनास्थळी भेट देऊन पाहणी केली असून सीसीटीव्ही फुटेज ताब्यात घेतले आहे. या परिसरात चोरीच्या घटनांमध्ये वाढ होत असल्याने नागरिकांमध्ये चिंता व्यक्त केली जात आहे.
कोट :
- “देवीच्या अंगावरील सोन्या-चांदीचे दागिने बँकेत सुरक्षित ठेवलेले आहेत. चोरी गेलेले मंगळसूत्र बेंटेक्सचे आहे.” – जानकु डावखर (देवस्थान अध्यक्ष)
- “ही चोरी पूर्वनियोजित वाटते. पोलिसांनी लवकरात लवकर तपास पूर्ण करून चोरट्यांना अटक करावी.” – राजेंद्र पिंगट (पंचायत समिती सदस्य)
