निलंगा पोलिसांची अन्सारवाडा शिवारात कारवाई; ६७ हजार २५ रुपयांचा गांजा जप्त
निलंगा (प्रतिनिधी) : अंमली पदार्थांविरोधात कारवाई करत निलंगा पोलिसांनी २ किलो १३५ ग्रॅम गांजासह एका व्यक्तीला अटक केली. चंद्रशेखर सुरेश पाटील असे अटक करण्यात आलेल्या आरोपीचे नाव असून, जप्त करण्यात आलेल्या गांजाची किंमत ६७ हजार २५ रुपये असल्याची माहिती पोलिसांनी दिली. ही कारवाई २५ ऑक्टोबर २०२६ रोजी निलंगा पोलीस ठाण्याच्या हद्दीतील अन्सारवाडा शिवारात करण्यात आली.
पोलिसांनी दिलेल्या माहितीनुसार, अन्सारवाडा शिवारात एक व्यक्ती गांजा विक्री करण्याच्या उद्देशाने येणार असल्याची गोपनीय माहिती निलंगा पोलीस ठाण्याचे प्रभारी अधिकारी अभिषेक शिंदे यांना मिळाली होती. या माहितीच्या आधारे त्यांनी पोलीस अधिकारी व अंमलदारांचे पथक तयार करून आवश्यक मार्गदर्शन केले आणि कारवाईचे आदेश दिले.
त्यानुसार, पोलीस पथकाने अन्सारवाडा शिवारात सापळा रचला. यावेळी संशयित चंद्रशेखर सुरेश पाटील याला त्याच्या एमएच २५ एवाय ९०९६ क्रमांकाच्या मोटारसायकलच्या डिक्कीमध्ये गांजा बाळगलेल्या अवस्थेत पकडण्यात आले. त्याच्याकडून २ किलो १३५ ग्रॅम गांजा जप्त करून त्याला अटक करण्यात आली.
या कारवाईत सहाय्यक पोलीस निरीक्षक सदानंद वाघमारे, सहाय्यक पोलीस निरीक्षक धनाजी खापरे, परिविक्षाधीन पोलीस उपनिरीक्षक ज्ञानेश्वर सोळंके, श्रेणी पोलीस उपनिरीक्षक रमेश म्हेत्रे, पोलीस हवालदार बालाजी विभुते, गोपाळ बर्डे, दयानंद वासुदेव, दादा शिंदे, महिला पोलीस हवालदार कल्पना साठे, तसेच पोलीस अंमलदार श्याम कुंभार, बाळकृष्ण मगर, भीमाशंकर भोसले, प्रदीप एरणवाड आणि प्रकाश चव्हाण यांनी सहभाग घेतला.
या प्रकरणाचा पुढील तपास सहाय्यक पोलीस निरीक्षक सदानंद वाघमारे करीत आहेत. या कारवाईबद्दल लातूरचे पोलीस अधीक्षक अमोल तांबे, अपर पोलीस अधीक्षक मंगेश चव्हाण आणि उपविभागीय पोलीस अधिकारी विशाल ढुमे यांनी संबंधित पोलीस अधिकारी व अंमलदारांचे कौतुक केले.
अंमली पदार्थांची विक्री आणि अवैध वाहतूक रोखण्यासाठी निलंगा पोलिसांनी केलेल्या या कारवाईमुळे परिसरातील अंमली पदार्थविरोधी मोहिमेला बळ मिळाले आहे.
