दाऊळ रोड परिसरातून २७ हजारांचा चोरीचा माल जप्त; शरद भिल याला अटक, अन्य आरोपींचा शोध सुरू
दोंडाईचा : प्रतिनिधी
दोंडाईचा शहरातील भांड्याच्या गोदामात झालेल्या चोरीचा गुन्हा दोंडाईचा पोलिसांनी उघडकीस आणला आहे. या प्रकरणी एका आरोपीला सुमारे २७ हजार रुपये किमतीच्या चोरीच्या मुद्देमालासह आणि गुन्ह्यात वापरलेल्या लोखंडी हत्यारासह ताब्यात घेऊन अटक करण्यात आली आहे. या गुन्ह्यातील इतर आरोपींचा पोलिसांकडून शोध सुरू आहे.
दिनांक २६ ऑक्टोबर २०२६ रोजी दुपारी १२ वाजेपासून ते २७ ऑक्टोबर २०२६ रोजी दुपारी १२ वाजेच्या दरम्यान दोंडाईचा शहरातील जुना शहादा रोड परिसरातील आयल कम्पाऊंड येथील भांडे व्यावसायिक युसुफ हातीमभाई कादीयानी यांच्या गोदामात चोरी झाली होती. अज्ञात चोरट्यांनी गोदामाच्या मागील भिंतीला भगदाड पाडून स्टील, तांबे आणि पितळेची भांडी चोरून नेली होती.
याप्रकरणी फिर्यादी युसुफ हातीमभाई कादीयानी यांच्या तक्रारीवरून दोंडाईचा पोलीस ठाण्यात गुन्हा रजिस्टर क्रमांक २१२/२०२६ अन्वये भारतीय न्याय संहिता कलम ३०५(अ), ३३१(३) आणि ३३१(४) प्रमाणे ४ नोव्हेंबर २०२६ रोजी गुन्हा दाखल करण्यात आला होता.
गुन्हा दाखल होताच पोलीस निरीक्षक दिनेश सोनवणे यांनी पोलीस अधीक्षक, अपर पोलीस अधीक्षक आणि शिरपूर विभागाचे उपविभागीय पोलीस अधिकारी यांना घटनेची माहिती दिली. वरिष्ठांच्या सूचनेनुसार दोंडाईचा पोलीस ठाण्याच्या गुन्हे शोध पथकाने तपास सुरू केला. पोलीस उपनिरीक्षक इमरान खान यांच्या नेतृत्वाखाली पोलीस कॉन्स्टेबल प्रविण निकुंभे, हिरालाल सूर्यवंशी, निलेश हालोरे, निलेश धनगर आणि होमगार्ड अमिन शाहा यांनी तपासात सहभाग घेतला.
परिसरातील गुप्त बातमीदारांकडून मिळालेल्या माहितीच्या आधारे पोलिसांनी तपासाची चक्रे वेगाने फिरवली. त्यानुसार दोंडाईचा शहरालगत दाऊळ रोड परिसरात अमरावती नदीकाठी असलेल्या काटेरी झुडपांमध्ये संशयित शरद काशिनाथ भिल (वय २१, रा. टेकमिलाटी, ता. शिंदखेडा, जि. धुळे) याला ताब्यात घेण्यात आले. त्याच्याकडून स्टीलची ताटे, पातेली, तांब्याची भांडी, जेवणाचे डबे, तांब्याचा हांडा, पितळाचा हांडा तसेच गुन्ह्यात वापरलेली लोखंडी टॉमी असा एकूण अंदाजे २७ हजार रुपये किमतीचा मुद्देमाल जप्त करण्यात आला.
पोलिसांच्या तपासादरम्यान आरोपीने साथीदारांसह जुना शहादा रोडवरील भांड्याचे गोदाम फोडून चोरी केल्याची कबुली दिल्याचे पोलिसांनी सांगितले. त्यानंतर त्याला संबंधित गुन्ह्यात अटक करण्यात आली. या प्रकरणातील इतर आरोपींचा शोध सुरू असून, पुढील तपास पोलीस कॉन्स्टेबल निलेश हालोरे करीत आहेत.
ही कारवाई पोलीस अधीक्षक विशाल आनंद, अपर पोलीस अधीक्षक अजय देवरे आणि शिरपूर विभागाचे उपविभागीय पोलीस अधिकारी सुधीर पाटील यांच्या मार्गदर्शनाखाली दोंडाईचा पोलीस ठाण्याचे प्रभारी अधिकारी दिनेश सोनवणे, पोलीस उपनिरीक्षक इमरान खान, पोलीस कॉन्स्टेबल हिरालाल सूर्यवंशी, प्रविण निकुंभे, निलेश हालोरे, निलेश धनगर आणि होमगार्ड अमिन शाहा यांनी केली.
