कन्नड प्रतिनिधी |
कन्नड शहरातील शिवना नदीच्या काठावर वसलेले अतिप्राचीन आणि भाविकांचे श्रद्धास्थान असलेल्या लिंगेश्वर महादेव मंदिराचा (लंगोटी महादेव) आता कायाकल्प होणार आहे. मंदिराच्या नूतनीकरणाच्या कामाचा शुभारंभ गुरुवारी मान्यवरांच्या हस्ते कुदळ मारून करण्यात आला.
शिवनगर परिसरात दिमाखात उभे असलेले हे ऐतिहासिक मंदिर अत्यंत जुने असून, सध्या मंदिराचे बांधकाम अनेक ठिकाणी जीर्ण झाले आहे. जागोजागी भेगा पडणे आणि बांधकाम खचण्याची स्थिती निर्माण झाल्यामुळे मंदिराची किरकोळ डागडुजी करताना काही दिवस मंदिर बंद ठेवावे लागत होते. ही बाब लक्षात घेऊन भाविक आणि दानशूर व्यक्तींनी मंदिराच्या संपूर्ण नूतनीकरणाचा निर्णय घेतला आहे.
या शुभारंभ कार्यक्रमाला पुजारी दिलीप गिरी, गोविंद भारूका, जगदीश दाभाडे, लोंढे साहेब, योगेश पाटील, गोकुळ राठोड, मनसेचे दिनकर जाधव, देशमुख नाना, दत्ता नागरे यांच्यासह महिला व नागरिक मोठ्या संख्येने उपस्थित होते.
मागील वर्षी झालेल्या मुसळधार पावसामुळे शिवना नदीला आलेल्या पुराचे पाणी मंदिरात शिरले होते. त्यामुळे मंदिराच्या संरचनेला मोठा फटका बसला होता. या पार्श्वभूमीवर मंदिराचा जीर्णोद्धार करणे आवश्यक असल्याचे मत नागरिकांनी व्यक्त केले.
दरम्यान, मंदिराच्या नूतनीकरणासाठी नागरिकांनी आणि भाविकांनी सढळ हाताने मदत करावी, असे आवाहन आयोजकांकडून करण्यात आले आहे.
