कन्नड प्रतिनिधी
कन्नड शहरात तडीपार असलेल्या एका तरुणाकडून अवैधरित्या नशेच्या गोळ्या जप्त करत पोलिसांनी त्याला अटक केली आहे. या कारवाईत मोबाईल, दुचाकीसह एकूण ७५ हजार ३४० रुपयांचा मुद्देमाल जप्त करण्यात आला आहे.
अतिरिक्त पोलीस अधीक्षक अपराजिता अग्निहोत्री यांना मिळालेल्या गुप्त माहितीनुसार पोलीस निरीक्षक रंगनाथ सानप यांना संबंधित इसमावर कारवाई करण्याचे आदेश देण्यात आले होते. त्यानुसार पोलीस निरीक्षक सानप, हेड कॉन्स्टेबल कैलास निंभोरकर, पोलीस अमलदार विजय चौधरी, ग्रामविकास अधिकारी नितेश वेद आणि औषध निरीक्षक मनोज पैठण यांच्या पथकाने रात्री १ ते २ वाजण्याच्या सुमारास बसस्थानकासमोरील खांडसरी परिसरात सापळा रचला.
यावेळी आंब्याच्या झाडाजवळ मोटारसायकलसह संशयास्पदरीत्या उभ्या असलेल्या इसमाची चौकशी करण्यात आली. त्याने आपले नाव निखिल मधुकर सुरे, रा. नवजीवन कॉलनी, साने गुरुजी शाळेजवळ असे सांगितले.
तहसीलदार सारिका भगत, दोन पंच आणि औषध निरीक्षक यांच्या उपस्थितीत त्याची झडती घेतली असता त्याच्या खिशात नशेच्या गोळ्या आढळून आल्या. तसेच एक मोबाईल आणि सुझुकी कंपनीची दुचाकी असा एकूण ७५ हजार ३४० रुपयांचा मुद्देमाल पोलिसांनी जप्त केला.
या प्रकरणी पोलीस अमलदार विजय चौधरी यांच्या फिर्यादीवरून गुन्हा दाखल करण्यात आला असून पुढील तपास पोलीस निरीक्षक रंगनाथ सानप हे अतिरिक्त पोलीस अधीक्षक अपराजिता अग्निहोत्री यांच्या मार्गदर्शनाखाली करत आहेत.
विशेष म्हणजे, संबंधित आरोपी हा तडीपार होता आणि त्याच्या तडीपारीची मुदत संपण्यास अवघे १५ दिवस बाकी असतानाच तो पुन्हा अवैध कृत्यात आढळून आला.
