ब्रम्हपुरी ता. प्रतिनिधी | २४ मे
कोसंबी खडसमारा येथे गॅस सिलिंडर स्फोटामुळे तीन भावांची घरे जळून खाक झाल्याच्या दुर्दैवी घटनेनंतर विजय वडेट्टीवार यांनी पीडित कुटुंबीयांना आर्थिक मदत देत धीर दिला.
या आगीत संतोष निकुरे, कार्तिक निकुरे आणि रूषी निकुरे यांच्या घरांतील संसारोपयोगी साहित्य, धान्य, कपडे तसेच इतर महत्त्वाच्या वस्तू जळून खाक झाल्या. या घटनेमुळे संबंधित कुटुंबांवर मोठे आर्थिक संकट कोसळले असून गावात हळहळ व्यक्त होत आहे.
घटनेची माहिती मिळताच विधिमंडळ काँग्रेस पक्षनेते आणि ब्रम्हपुरी विधानसभा क्षेत्राचे आमदार विजय वडेट्टीवार यांनी तातडीने दखल घेत आपल्या कार्यकर्त्यांना पीडित कुटुंबांशी संपर्क साधण्याच्या सूचना दिल्या. त्यानंतर स्वतः आर्थिक मदत देत “संकटाच्या काळात आपण त्यांच्या पाठीशी ठामपणे उभे आहोत,” असा विश्वास त्यांनी व्यक्त केला.
तसेच शासन स्तरावरूनही संबंधित कुटुंबांना मदत मिळवून देण्यासाठी प्रयत्न करण्यात येणार असल्याचे त्यांनी सांगितले.
या मदत वितरणावेळी तालुका काँग्रेस कमिटीचे अध्यक्ष खेमराज तिडके, सरचिटणीस गुरुदेव वाघरे, युवक काँग्रेसचे जिल्हा सरचिटणीस रुपेश बानबले, उपसरपंच सुरेश ठिकरे, कृउबा संचालक ज्ञानेश्वर झरकर, प्रशासक संगीता जेंगठे, मारोती गेडाम, प्रशांत मलोडे, माजी पोलीस पाटील एकनाथ कोटनाक, मिलिंद जुमनाके, स्वप्निल सुरपाम, नारायण बुध्दे, रवी अंबाडोरे, वामन मोहूरले यांच्यासह काँग्रेस कार्यकर्ते व ग्रामस्थ मोठ्या संख्येने उपस्थित होते.
