इंदापूर (प्रतिनिधी)
इंदापूर तालुक्यातील सणसर ग्रामपंचायतीच्या विशेष ग्रामसभेत प्राथमिक आरोग्य केंद्राच्या जागेच्या प्रश्नावर सविस्तर चर्चा होऊन अखेर नवीन जागेचा प्रस्ताव सर्वानुमते मंजूर करण्यात आला. गावाच्या विकासाच्या दृष्टीने एकमताने घेतलेल्या या निर्णयामुळे ग्रामस्थांमध्ये समाधानाचे वातावरण निर्माण झाले आहे.
ग्रामसभेत प्राथमिक आरोग्य केंद्राची जागा, गावाचा भविष्यातील विकास, नागरिकांना अधिक सक्षम आरोग्य सुविधा उपलब्ध करून देणे तसेच प्रशासकीय नियोजन या मुद्द्यांवर सखोल चर्चा करण्यात आली. काही ग्रामस्थांनी जुन्या जागेबाबत मते मांडली, तर अनेकांनी वाढती लोकसंख्या आणि भविष्यातील गरज लक्षात घेऊन नवीन जागा अधिक योग्य असल्याचे मत व्यक्त केले.
ग्रामसेवक सचिन पवार यांनी विषय सभेपुढे सादर करत प्राथमिक आरोग्य केंद्र नवीन जागेवर उभारण्याचा प्रस्ताव मांडला. त्यानंतर ग्रामस्थांनी आपली मते मांडून चर्चेनंतर सर्वानुमते ठराव मंजूर करण्यात आला.
ग्रामसभेत उपस्थित नागरिकांनी गावाच्या विकासासाठी मतभेद बाजूला ठेवून एकत्रित निर्णय घेणे ही अत्यंत सकारात्मक बाब असल्याचे मत व्यक्त केले. या निर्णयामुळे सणसर गावात भविष्यात अधिक दर्जेदार आरोग्य सुविधा उपलब्ध होण्यास मदत होणार असून नियोजनबद्ध विकासाला चालना मिळेल, असा विश्वास ग्रामस्थांनी व्यक्त केला.
ग्रामसभेला माजी पदाधिकारी, सामाजिक कार्यकर्ते, विविध संस्थांचे प्रतिनिधी, युवक वर्ग तसेच मोठ्या संख्येने ग्रामस्थ उपस्थित होते. या निर्णयामुळे सणसरच्या विकासाला नवी दिशा मिळेल, अशी अपेक्षा व्यक्त करण्यात आली.
